Չկա մարտական հենակետ, կա հայրենիք, որ ազգն է պաշտպանում

Մենք պետք է պատրաստ լինենք. շուտով Ռուսաստանը նորից զենք կվաճառի Ադրբեջանին, իսկ մենք նորից պետք է կռվենք նույն զենքով:

Այս մասին այսօր լրագրողների հետ զրույցում ասաց Արցախյան ազատամարտի մասնակից, «Կարին» ազգագրական երգի ու պարի համույթի գեղարվեստական ղեկավար Գագիկ Գինոսյանը ՝ հավելելով, որ մեր հույսը մեր սահմանները անառիկ պահող զինվորներն են.«Ինչո՞ ւ պետք է նախարարները 2015-2016-ի թանկարժեք մեքենաներով շրջեն, իսկ մեր զինվորները 80-ականների զենքով կռվեն»,-նկատեց Գինոսյանը:

Նա միևնույն ժամանակ հիշեց Նժդեհի խոսքերն ու ասաց, որ ամեն մի սերունդ պետք է գերազանցի իր նախորդին՝ ոգով և խիզախությամբ, ինչը քառօրյա պատերազմի ժամանակ ևս մեկ անգամ ցույց տվեցին մեր զինվորները:

Ազգի գիտակցամամբ չկան մարտական հենակետեր, կա հայրենիք, որի նկատմամբ ոտնձգություններ չպետք է կատարվեն:

«Տարածք գոյություն չունի, կա հայրենիք, որը որևէ կերպ վերադարձնելու որևէ հարց չպետք է բարձրանա»,- նշեց Գ.Գինոսյանը՝ հավելելով, որ պատերազմի դաշտում աննշան տարածքներ, դիրքեր չեն լինում:

«Կարին» ազգագրական երգի ու պարի համույթի գեղարվեստական ղեկավարը նաև հայտնեց, որ համույթի անդամները՝ հետախույզ Վովա Վարդանովի համագործակցությամբ, պարապմունքներ են անցկացնում՝ առաջնագիծ մեկնելու համար:

Ասուլիսի մյուս բանախոս Տեր Եսայի քահանա Արթենյանը կարևորեց այն, որ այս օրերին մեր հասարակությունը, ինչպես նաև ողջ հայությունը համախմբվեց և այդ համախմբման հիմքում նաև մեր կրոնն է: