Հայաստանի տնտեսությունը հենց հիմա վճարում է Կոսի կամ Կալլասի գովասանքներին արժանանալու դիմաց՝ կորցնելով եկամուտներ ու աշխատատեղեր․ քաղաքագետ

Քաղաքագետ Հակոբ Բադալյանը գրում է. «Նա, ով լսում է իր ժողովրդին, շահում է տնտեսապես։ Այս հայտարարությունն անում է Վրաստանի խորհրդարանի նախագահը, անդրադառնալով եվրահանձնակատար Կոսի հայտարարությանը՝ Մոլդովայի եվրաինտեգրման առաջընթացի մասին։

Պապուաշվիլին՝ Վրաստանի խորհրդարանի նախագահը, նկատել է, որ եվրաինտեգրման ուղով առաջընթացի հարցում Կոսի գովասանքին արժանացող Մոլդովայի տնտեսական աճի ցուցանիշը մի փոքր է բարձր զրոյից, այն դեպքում, երբ Վրաստանի տարեկան տնտեսական աճը հասնում է գրեթե տասը տոկոսի։

Ինչպես ասում են՝ Կոսն ուր, տասն ուր։

Եթե լուրջ, ապա սա շատ արդիական խնդիր է Հայաստանի համար, Հայաստանի տնտեսության համար։ Որովհետև Հայաստանի տնտեսությունը հենց հիմա վճարում է Կոսի կամ Կալլասի գովասանքներին արժանանալու դիմաց, վճարում է կորցնելով եկամուտներ, վճարում է կորցնելով աշխատատեղեր, կորցնելով ավանդական շուկաներ, ինչից նաեւ օգտվում են Հայաստանի հակառակորդները։

Ընդ որում, կորուստների, այլ կերպ ասած՝ տնտեսությունը ընդամենը իշխանական քաղաքական կոնյուկտուրայի «զոհասեղանին» մատուցելու պրոցեսը ունի շարունակվելու բարձր հավանականություն։ Իսկ այն պրիմիտիվությունը, թե պետությունը կարող է ձեռք բերել ինքնիշխանություն, այն դեպքում, երբ ակնհայտորեն կորցնում է տնտեսական դաշտում, կարող է բավարարել միայն «լյումպենին»։ Որովհետեւ ցանկացած ողջախոհ մարդ պատկերացնում է, որ տնտեսությունն է պետական դիմադրունակության ու կենսուակության հիմքը, հետեւաբար հնարավո չէ պետության դիմադրունակություն բարձրացնել դրա հիմքը խարխլելու գնով»: