Նիկոլ Փաշինյանի «խորհրդավոր» հյուրը

«Շաքիի միջադեպի ֆոնին բաց չթողնենք մի իրադարձություն, որը խորքային առումով պակաս արժանի չէ ուշադրության, եթե չասենք՝ ավելի»,-գրում է քաղաքական վերլուծաբան Հակոբ Բադալյանն ու մանրամասնում.

«Նիկոլ Փաշինյանը կառավարությունում հյուրընկալել էր Սպիտակ տան Հավատքի հարցերի գրասենյակի ավագ խորհրդական Փոլա Ուայթ–Քեյնին։ Նրան հրավիրել են Հայաստանում կայանալիք Աղոթքի նախաճաշին մասնակցելու։ Քննարկվել են գործակցության հարցեր, եւ այդ համատեքստում Սպիտակ տան ներկայացուցիչը արել է հետեւյալ մի հայտարարություն․ «Տիկին Ուայթ-Քեյնը նշել է, որ շահագրգիռ են սերտորեն համագործակցել ինչպես ՀՀ Կառավարության, այնպես էլ ԱՄՆ-ի հայ հոգևոր առաջնորդների հետ»։

Իսկ ո՞ւր է Հայ Առաքելական եկեղեցին՝ Սպիտակ տան Հավատքի հարցերի գրասենյակի ավագ խորհրդականի համար։ Ի՞նչ է նշնակում ԱՄՆ հայ հոգեւոր առաջնորդների հետ աշխատանք։ Ովքե՞ր են նրանք։ ՀԱԵ թեմերի՞ բարձրաստիճան հոգեւորականները, թե նաեւ այլ կրոնական հայկական կառույցների ներկայացուցիչներ։ Եթե թեմերի առաջնորդները այդ շարքում են, արդյո՞ք աշխատանքը ենթադրելու է նրանց Նիկոլ Փաշինյանի օրակարգ բերելը, այսինքն Մայր Աթոռի դեմ տրամադրլը։ Սրանք կարծում եմ հիմք ունեցող հարցեր են, երբ ամերիկացի պաշտոնյան խոսում է սերտ աշխատանքի պատրաստակամության մասին՝ զբաղվե;ով Հավատքի հարցերով, բայց գործընկերների շարքում չի նշում ՀԱԵ–ն։

Եվ այդ իմաստով նաեւ հետաքրքիր է, թե նա արդյո՞ք Հայաստանում գտնվելու ընթացքում կայցելի Մայր Աթոռ եւ հանդիպում կունենա Ամենայն Հայոց Կաթողիկոսի հետ։ Փոլա Ուայթ–Քեյնի հայաստանյան այցը փաստորեն նախապատրաստվել է սեպտեմբերի սկզբին նրա հետ ԱՄՆ–ում Հայաստանի դեսպան Նարեկ Մկրտչյանի շփումով։ Ես անդրադարձել էի դրան, ուշադրություն հրավիրելով այդ հանգամանքի վրա, թեեւ դրա մասին հաղորդագրությունը չէր հայտնում, որ կրող է տեղի ունենալ Ուայթ–Քեյնի այց Հայաստան։

Միաժամանակ, շատ կարեւոր, թերեւս առանցքային հանգամանք է այն, որ Ուայթ–Քեյնը ունի սերտ կապեր ԱՄՆ քրիստոնյա–սիոնիստների համայնքի հետ, եւ մեծ հաշվով Սպիտակ տանը նրանց առանցքային ներկայացուցիչ է»։