Դալարում կնոջն ու 6-ամյա երեխային վրաերթի ենթարկելու դեպքով քրեական հետապնդում է հարուցվել․ ՔԿ-ն՝ NEWSPRESS.am-ին

Օրեր առաջ NEESPRESS.am-ը գրել էր, որ Արարատի մարզի Արտաշատի շրջանի Դալար գյուղում մոտ 2 ամիս առաջ  տեղի է ունեցել վրաերթ: Մասնավորապես՝ «Դալար գյուղում ոստիկանը վրաերթի է ենթարկել կնոջն ու նրա 6-ամյա որդուն և դիմել փախուստի. գործը փորձում են սառեցնել» վերտառությամբ հոդվածում, մեր աղբյուրների փոխանցմամբ, նշել էինք, որ գյուղի բնակչուհիներից Սուսաննա Հարությունյանին, իր 6-ամյա որդու՝ Գոռի հետ, վրաերթի է ենթարկել  Արտաշատի ոստիկանության բաժնի աշխատակից, կապիտան Գրիգոր Թադևոսյանը:

Այս լուրը մեզ հետ զրույցում, ըստ էության հաստատել էր նաև Դալարի համայնքապետ Հովհաննես Հովհաննիսյանը: 

Հաշվի առնելով, որ ճանապարհատրանսպորտային պատահարների դեպքում, երբ կա տուժած կամ զոհ, հատկապես երբ դեպքի մասնակիցը դիմել է փախուստի, քննությունն իրականացնում է Քննչական կոմիտեն՝ փորձեցինք հստակեցնել՝ դեպքի առնչությամբ ՔԿ-ում արդյոք նախաձեռնվել է քրեական վարույթ, Գրիգոր Թադևոսյանին մեղադրանք առաջադրվե՞լ է, և եթե այո՝ արդյոք կասեցվել է նրա ծառայողական գործունեությունը։

NEWSPRESS.am-ի գրավոր հարցմանն ի պատասխան՝ ՔԿ-ից տեղեկացրին, որ դեպքի առնչությամբ նախաձեռնվել է քրեական վարույթ:

«2026 հուլիսի 20-ին ՀՀ Քննչական կոմիտեի Արարատի մարզային քննչական վարչությունում Քրեական օրենսգրքի 342-րդ  հոդվածի 1-ին մասով, նախաձեռնվել է քրեական վարույթ:

Մեկ անձի նկատմամբ հարուցվել է հանրային քրեական հետապնդում և կիրառվել համապատասխան խափանման միջոց:

Նախաքննությունը շարունակվում է»,- ասված է Քննչական կոմիտեի պատասխանում։

Թեև ՔԿ-ից այլ մանրամասներ չեն հայտնել, սակայն, NEWSPRESS.am-ի տեղեկություններով, Գրիգոր Թադևոսյանի ծառայողական գործունեությունը կասեցվել է։

Արմինե Մկրտումյան