Բջջայինների մասին աղմկահարույց օրինագիծն ուղարկվել է լրամշակման

Ազգային ժողովի տնտեսական հարցերի մշտական հանձնաժողովի սեպտեմբերի 30-ի նիստում օրակարգից հանվել է «Էլեկտրոնային հաղորդակցության մասին» օրենքում և հարակից օրենքներում փոփոխություններ նախատեսող աղմկահարույց օրենսդրական փաթեթը։

Հանձնաժողովի նախագահ, «Քաղաքացիական պայմանագիր» խմբակցության պատգամավոր Բաբկեն Թունյանը հայտնել է, որ նախագծի քննարկումը հետաձգվում է երկու ամսով։ «Ոլորտի փորձագետների հետ նախնական քննարկումներ ենք ունեցել և եկել այն եզրակացության, որ այս նախաձեռնության վերաբերյալ կան լրացուցիչ պարզաբանման կարիք ունեցող հարցեր։ Մենք խոստացել էինք, որ նախագիծը վերջնական տեսքի բերելուց հետո այն պատշաճ կերպով կհամաձայնեցնենք նրանց հետ և միայն դրանից հետո կքննարկենք հանձնաժողովում։ Ընդունում ենք, որ փաստաթղթում կան դրույթներ, որոնք շտկման կարիք ունեն»,— պարզաբանել է Թունյանը։

«Փորձ է արվում պաշտպանել բաժանորդներին գողացված կամ օգտագործված, բայց որպես նոր ներկայացվող հեռախոսներից։ Նախագծի հետաձգման մեջ որևէ թաքնված միտում չկա։ Այն ամենը, ինչ ազդում է բազմաթիվ մարդկանց կյանքի վրա, պետք է քննարկվի մանրամասն և հնարավորինս հանրային ձևով»,— հավելել է իշխող ուժի ներկայացուցիչը։

Նիստին ներկա Բարձր տեխնոլոգիական արդյունաբերության և արհեստական բանականության նախարար Դավիթ Թադևոսյանն իր հերթին նշել է, որ ֆիսկալ խնդիրները լուծելու համար նախագծում անհրաժեշտ է ներառել առավել կիրառելի, չափելի և տեխնիկապես հստակ ձևակերպված հասկացություններ։

Ավելի վաղ ՀՀ կառավարությունը հավանություն էր տվել բջջային հեռախոսների միջազգային նույնականացնող կոդերի (IMEI) միասնական համակարգի ներդրման նախագծին։ Ըստ այդմ՝ նոր կարգավորումները չեն տարածվելու այն հեռախոսների վրա, որոնք արդեն իսկ միացված են բջջային օպերատորների ցանցերին։ Կառավարության ծրագրերով՝ որոշումը պետք է ուժի մեջ մտնի 2027 թվականի հունվարի 1-ից։

Մինչդեռ ընդդիմադիր «Ուժեղ Հայաստան» խմբակցության քարտուղար Տիգրան Աբրահամյանի համոզմամբ՝ ներկայացված օրենսդրական նախաձեռնության նպատակը քաղաքացիների անձնական տվյալներ ստանալն է։ «Սա հետագայում կարող է հնարավորություն տալ այդ տվյալներն օգտագործել այս կամ այն քաղաքացու իրավունքների ու ազատությունների դեմ»,— ընդգծել է ընդդիմադիր պատգամավորը՝ հավելելով, որ նման օրենքի ընդունման նպատակահարմարությունը լուրջ քննարկման կարիք ունի, մանավանդ որ եվրոպական փորձը ցույց է տալիս, որ IMEI համակարգի ներդրման պարտադիր պահանջ գոյություն չունի։