Վանաձոր-Ալավերդի-Վրաստանի սահման տանող ճանապարհը կվերականգնվի

Վաղը կառավարության նիստի օրակարգում ընդգրկված է Վանաձոր-Ալավերդի-Վրաստանի սահման միջպետական ավտոմոբիլային ճանապարհի վերականգնման և արդիականացման ծրագրի իրականացման գործընթացի նախագիծը, որը ներկայացնելու է Տրանսպորտի և կապի նախարար Գագիկ Բեգլարյանը:

Նշենք, որ Եվրոպական ներդրումային և Ասիական զարգացման բանկերից ներգրավվելիք բանկային միջոցներով 2016 թվականին նախատեսվում է սկսել ավտոճանապարհի աշխատանքները: Նախատեսվում է երթևեկելի մասի լայնացման, ինչպես նաև որոշակի հատվածներում ճանապարհի ծրագրի փոփոխման աշխատանքներ:

Հավելենք, որ ապրիլյան քառօրյա պատերազմը ակնհայտ դարձրեց Հայաստանի միջպետական, միջհամայնքային ճանապարհների ողբալի վիճակը:

Անգամ Սիսիանի ճանապարհը, որը այնքան կարևոր օղակներից է և կապում է Երևանը Արցախի ու Մեղրիի հետ՝ գտնվում է անմխիթար վիճակում: Նման վիճակում են Հայաստանի միջհամայնքային ճանապարհները, որոնք գտնվելով աչքից հեռու վայրերում ուշադրության չեն արժանանում:

Գրեթե համանման իրավիճակում է Վանաձոր-Ալավերդի-Վրաստանի ճանապարհը, այն կիսաքանդ է:

Ընդհանրապես Հայաստանի ճանապարհային ցանցը նախապատմական դարաշրջանն է հիշեցնում: Որքան էլ զարմանալի է, Երևանում երկու կամ երեք տարի պարբերությամբ գլխավոր փողոցները, մայթերը նորոգվում, վերանորոգվում են և կառուցվում:

Կարծես թե որոշել են սայլը տեղից շարժել, եթե միջպետական, հանրապետական նշանակության ճանապարհները կամաց-կամաց նորոգեին և կառուցեին, այսօր այդքան ահռելի ֆինանսական ռեսուրսների կարիք չէր զգացվի: