Պարգևավճարներ՝ «յուրայիններին». կոռուպցիոն ռիսկեր և կամայականություն՝ Աբեղյանի անվան գրականության ինստիտուտում

Օրեր առաջ ստացված ահազանգերի հիման վրա, NEWSPRESS.am-ն անդրադարձել էր ՀՀ ԳԱԱ Մ. Աբեղյանի անվան գրականության ինստիտուտում ստեղծված իրավիճակին։

Մեզ դիմած անձինք, որոնք տարբեր պատճառներով չէին ցանկացել հրապարակել իրենց անունները, բարձրաձայնել էին կառույցում տարիների ընթացքում կուտակված մի շարք խնդիրներ՝ կապված ինստիտուտի ներսում ձևավորված լարված մթնոլորտի հետ:

NEWSPRESS.am-ը գրել էր նաև ինստիտուտի աշխատակիցների շրջանում դժգոհությունների պատճառ դարձած պարգևավճարների բաշխման մասին։ Մեզ փոխանցված տեղեկության համաձայն,  63 գիտաշխատող ունեցող ինստիտուտում 2025 թվականին, բացառությամբ հետմահու և վերջնահաշվարկով տրամադրված գումարների, պարգևավճարների և այլ վճարների ձևով բաշխվել է ընդհանուր 2 861 948 դրամ։

Ուշագրավ է, որ պարգևավճարներ ստացել է ինստիտուտի 63 գիտաշխատողից միայն 18-ը։ Ընդ որում, մի շարք աշխատակիցների տրամադրված պարգևավճարները կազմել են շատ փոքր գումարներ։ Մեզ հասած տվյալների համաձայն՝ ինստիտուտի աշխատակիցներին բաշխված ընդհանուր պարգևավճարների շուրջ 15 տոկոսը բաժին է հասել ինստիտուտի փոխտնօրեն Մարինե Սարգսյանին։ Նույն տեղեկության համաձայն, ինստիտուտի տնօրեն Հերիքնազ Որսկանյանը պարգևավճար չի ստացել։

Փաստերի այս համադրությունը նոր հարցեր է առաջացնում ինստիտուտում պարգևավճարների բաշխման սկզբունքների վերաբերյալ։ Միաժամանակ, փոխտնօրեն Մարինե Սարգսյանին հատկացված պարգևավճարի չափը համադրելի է այն ահազանգերի հետ, որոնց մասին գրել էինք մեր նախորդ հրապարակման մեջ։

Այս խտրականությունն էլ ինստիտուտում էլ ավելի է սրել իրավիճակն ու լարվածություն առաջացրել:

Ինչպես դասականը կասեր՝ ինստիտուտում բաժանված են սևերի ու սպիտակների. մի կողմում ղեկավարության համակրանքը վայելող «յուրայիններն» են, իսկ մյուս կողմում՝ գիտական արդյունքներ արձանագրող մասնագետները, որոնք իրենց գիտական գործունեությանը համապատասխան աջակցություն չեն ստանում։ 

Հարկ ենք համարում ԿԳՄՍՆ-ի ուշադրությունը հրավիրել խնդրին:

Ի դեպ, եթե պարզվի, որ պարգևավճարների չափը և բաշխման ձևը զուտ կամայականության սկզբունքով է արվել, ապա կարելի է ասել, որ գործ ունենք կոռուպցիոն ռիսկերի հետ: