Պետք է որակումների մեջ զգոն լինել. Հ. Սահակյանը ՌԴ-ին քննադատելու մասին

Ղարաբաղա-ադրբեջանական սահմանագծում տեղի ունեցած մարտական գործողություններին Հավաքական անվտանգության պայմանագրի կազմակերպությունը (ՀԱՊԿ) մինչ օրս չի արձագանքել:

Թեև քառօրյա պատերազմի ընթացքում գնդակոծվել են հայկական բնակավայրեր, վիրավորվել խաղաղ բնակիչներ, սակայն ՀՀԿ անդամ, ԱԺ Պետաիրավական մշտական հանձնաժողովի նախագահ Հովհաննես Սահակյանը newspress.am-ի հետ զրույցում վստահեցնում է, որ խնդիրը ՀԱՊԿ-ի գործառույթում չէ:

Նրա խոսքով՝ ՀԱՊԿ անդամ հանդիսանում է Հայաստանը, ոչ թե Արցախը և ղարաբաղա-ադրբեջանական սահմանագծի որակումներն ու գնահատականերն են այլ:

«Մենք պետք է արագացնենք Արցախի հետ ռազմական օգնության պայմանագրի հաստատման ընթացքը, որպեսզի կարողանանք Արցախի պաշտպանության բանակին ու Արցախի ժողովրդին շատ ավելի արագ և հնարավոր ձևով օգնություն ցուցաբերենք»,-ասաց իշխանական կուսակցության ներկայացուցիչը՝ հավելելով, որ Հայաստանն Արցախի անկախ հանրապետության անվտանգության երաշխավորն է:

Հովհաննես Սահակյանը չհամաձայնեց այն մտքի հետ, որ խնդրի լուծման գործում պաշտոնական Մոսկվայի գործողությունները պասիվ են, ինչն ամենևին էլ չի խոսում իշխանության որակմամբ Ռուսասատանի՝ որպես դաշնակից երկրի մասին:

«Ես չէի ցանկանա նման կոշտ որակումներ անել: Թալիշի և այլ հատվածների հետ կապված եղել են ու կան խնդիրներ, որոնց մասին խոսել ենք, բայց նմանատիպ որակավորումներին էլ եմ դեմ, քանի որ ԼՂՀ հետ կապված խնդիրը ակտիվացել է ոչ միայն շփման գծում, այլև բանակցային գործընթացի մեջ»,- նկատեց պատգամավորը՝ հավելելով, որ պետք է որակումների մեջ զգոն լինել: