Հայաստանը հաղթանակի համը չի զգացել ավելի քան մեկ տարի․ Լատվիական մամուլ

Ազգերի լիգայի 2026/27 խաղարկության մեկնարկային տուրում Հայաստանի ազգային հավաքականն այսօր՝ ժամը 20:00-ին, Երևանում կընդունի Լատվիայի ընտրանուն: Լատվիական հեղինակավոր Sporta centrs մարզական պարբերականն ընդարձակ հոդվածով անդրադարձել է առաջիկա դիմակայությանը՝ վերլուծելով թիմերի նախապատմությունն ու ներկայիս իրավիճակը:

Պարբերականը հիշեցնում է, որ երկու հավաքականները մրցել են նաև Ազգերի լիգայի նախորդ խաղարկությունում, որտեղ հայկական թիմը երկու խաղում էլ առավելության է հասել (4:1 Երևանում և 2:1 Ռիգայում): Լատվիան վեց խաղում վաստակած չորս միավորով այդ խմբում գրավել էր վերջին տեղը՝ զիջելով Հյուսիսային Մակեդոնիային, Հայաստանին և Ֆարերյան կղզիներին, սակայն մարտին Ջիբրալթարի դեմ անցումային խաղերում (1:0, 1:0) կարողացել էր հաջողությամբ պահպանել տեղը C լիգայում:

Աղբյուրը շեշտում է, որ 2026 թվականի աշնանը ՈւԵՖԱ-ն փորձարկում է միջազգային պատուհանի նոր ձևաչափ, ինչը Լատվիայի համար նշանակում է խիստ ծանրաբեռնված գրաֆիկ՝ 4 հանդիպում ընդամենը 11 օրվա ընթացքում:

Իտալացի գլխավոր մարզիչ Պաոլո Նիկոլատոն հավաքական է հրավիրել մի քանի հավանական նորեկների, որոնցից ամենահնչեղ անունը Դենիս Ցիրկինն է։ 24-ամյա ֆուտբոլիստը ծնվել է Իռլանդիայում և կարիերայի մեծ մասն անցկացրել է Անգլիայում (նախորդ տարի «Սանդերլենդի» կազմում նույնիսկ նորամուտը նշելով Պրեմիեր լիգայում), սակայն ունի լատվիական արմատներ: Ներկայումս նա հանդես է գալիս անգլիական Չեմպիոնշիփը ներկայացնող «Քուինզ Պարկ Ռեյնջերսում»: Ակումբի հետ ձեռք բերված համաձայնության արդյունքում Ցիրկինը հավաքականին կօգնի միայն առաջին երկու հանդիպումներում՝ Հայաստանի և Կիպրոսի դեմ: Միևնույն ժամանակ թիմին չի միացել առանցքային խաղացողներից Յանիս Իկաունիեկսը, ով վնասվածք է ստացել ՌՖՍ-ի մարզման ժամանակ:

Անդրադառնալով Հայաստանի հավաքականին՝ Sporta centrs-ն ընդգծում է. «Եթե Լատվիան մարտին երկու անգամ հաղթել է Ջիբրալթարին, ապա Հայաստանը հաղթանակի համը չի զգացել 2025 թվականի սեպտեմբերից ի վեր՝ ավելի քան մեկ տարի, երբ ԱԱ որակավորման փուլում սեփական հարկի տակ 2:1 հաշվով պարտության մատնեց Իռլանդիային»: Լատվիացիները հիշեցնում են, որ այդ խաղում գոլերի հեղինակ էին դարձել Էդուարդ Սպերցյանն ու Հրանտ-Լեոն Ռանոսը. վերջինս այս անգամ բացակայում է վնասվածքի պատճառով:

Հոդվածագիրը հատուկ ուշադրություն է դարձրել Սպերցյանի ակումբային կարիերայի նոր շրջադարձին՝ նշելով, որ այս ամռանը նա 4-ամյա պայմանագիր է կնքել սաուդյան «Ալ-Ահլիի» հետ, որտեղ նրա թիմակիցներն են լոնդոնյան «Չելսիի» նախկին դարպասապահ Էդուար Մենդին և Անգլիայի Պրեմիեր լիգայի լավագույն ռմբարկուներից Այվան Տոունին:

Բացի այդ, հոդվածում անդրադարձ կա հայկական ակումբային ֆուտբոլին. «Հայաստանի հավաքականի ֆուտբոլիստների մեծ մասը ներկայացնում են տեղական ակումբները, այդ թվում՝ «Արարատ-Արմենիան», որն այս ամռանը Չեմպիոնների լիգայի որակավորման փուլում պայքարից դուրս թողեց «Ռիգային» և հետագայում հասավ մինչև Եվրոպա լիգայի հիմնական փուլ»։

Հավելենք, որ ՖԻՖԱ-ի վարկանիշային աղյուսակում Հայաստանի հավաքականը զբաղեցնում է 106-րդ, իսկ Լատվիան՝ 137-րդ հորիզոնականը:

Աղբյուրը՝ Armsport.am: