Երևանի կողմից «ռեյդային զավթումների» նոր թիրախներ կարող են դառնալ Հայաստանում գործող ռուսական ձեռնարկությունները. ՌԴ ԱԽ քարտուղարի տեղակալ

Երևանի կողմից իրականացվող «ռեյդային զավթումների» նոր թիրախներ կարող են դառնալ Հայաստանում գործող ռուսական արդյունաբերական և ենթակառուցվածքային ձեռնարկությունները:

Այս մասին հայտարարել է ՌԴ Անվտանգության խորհրդի քարտուղարի տեղակալ Ալեքսեյ Շևցովը։

Նախօրեին ՌԴ Անվտանգության խորհրդի քարտուղար Սերգեյ Շոյգուն նշել էր, որ Հայաստանում գործող ռուսական բիզնեսի նկատմամբ դրսևորվում է ոչ բարեկամական գիծ և բացահայտ երկակի ստանդարտներ, և այն, ինչ տեղի է ունենում այն ձեռնարկությունների ու ամբողջական ոլորտների հետ, որոնցում Ռուսաստանը միլիարդավոր ներդրումներ է կատարել, այլ կերպ, քան «ռեյդային զավթում», դժվար է անվանել։

«Հաջորդ թիրախները կարող են դառնալ Հայաստանում գործող ռուսական արդյունաբերական և ենթակառուցվածքային ձեռնարկությունները»,- լրագրողներին ասել է Շևցովը։

Նրա խոսքով՝ շրջանառության մեջ են դրվում այդ ձեռնարկությունների թերֆինանսավորման, ներդրումային միջավայրի վրա դրանց բացասական ազդեցության, գործունեության հետևանքով հասցվող բնապահպանական վնասի, ինչպես նաև աշխատակիցների ցածր աշխատավարձերի մասին թեզերը։

«Դա արվում է ռուսական ակտիվների արժեքը նվազեցնելու և սեփականատերերին դրանցից հրաժարվել ստիպելու նպատակով»,- պարզաբանել է Շևցովը։