Իսրայելի ընդդիմության առաջնորդը պահանջել է մինչև ընտրությունները կասեցնել 12 նոր դեսպանների նշանակումը

Իսրայելի ընդդիմության առաջնորդ Յաիր Լապիդը գլխավոր դատախազ Գալի Բահարավ-Միարային խնդրել է կասեցնել արտգործնախարար Գիդեոն Սաարի առաջարկած 12 նոր դեսպանների նշանակումը, հայտնում է Ynet պարբերականը։

Լրատվամիջոցի տվյալներով՝ Լապիդը դիմում է ուղարկել իր փաստաբանի միջոցով՝ նշելով, որ թեկնածուների հաստատումը ներկայիս նախընտրական շրջանում կարող է սահմանափակել հաջորդ արտգործնախարարի հնարավորությունները։

Լապիդը, որը 2021–2022 թվականներին զբաղեցրել է Իսրայելի արտգործնախարարի պաշտոնը, հղում է անում գլխավոր դատախազի հանձնարարականներին և Գերագույն դատարանի որոշմանը, ըստ որոնց՝ ընտրությունների շրջանում անցումային կառավարությունը պետք է զսպվածություն դրսևորի և չընդունի որոշումներ, որոնք պայմանավորված չեն հրատապ հանրային անհրաժեշտությամբ։

Դիմումի մեջ, ինչպես պնդում է Ynet-ը, առանձին ընդգծվում է, որ Լապիդը կասկածի տակ չի դնում առաջարկված թեկնածուների մասնագիտական որակավորումը։ Սակայն, նրա կարծիքով, այժմ՝ ընտրություններից մոտ հինգ շաբաթ առաջ, նրանց նշանակման ընթացակարգն ավարտելու անհրաժեշտություն չկա։

Սաարը մտադիր է 12 թեկնածուներին ներկայացնել Արտաքին գործերի նախարարության նշանակումների հանձնաժողովին։ Նրանցից 11-ը պետք է պաշտոնը ստանձնեն միայն 2027 թվականի ամռանը, ևս մեկ դիվանագետ՝ 2028 թվականին։

Արտաքին գործերի նախարարությունից հայտնել են, որ նշանակումները պետք է կատարել նախապես, որպեսզի դիվանագետներն ու նրանց ընտանիքները հասցնեն պատրաստվել արտերկրում աշխատանքին։ Մասնավորապես, խոսքը վերաբերում է երեխաների համար դպրոցներ գտնելուն, տեղափոխությանը և նշանակման համար ընդունող պետությունների համաձայնությունը ստանալուն։

Գերատեսչությունում նշել են նաև, որ 12 թեկնածուներից կազմված ցուցակը համեմատաբար փոքր է նախորդ տարիների համեմատ։ Բացի դրանից, նմանատիպ ընթացակարգեր իրականացվել են նախորդ ընտրական արշավների ժամանակ նույնպես։ Նախարարության պնդմամբ՝ ներկայիս գործընթացն անցնում է Պետական ծառայության հարցերով հանձնաժողովի և Արդարադատության նախարարության լիակատար համաձայնեցմամբ։