ՀՀ-ի ստանձնած պարտավորությունը համահունչ է Սահմանադրությամբ ամրագրված ինքնիշխան պետության սկզբունքին

Սահմանադրական դատարանը՝ կազմով.
դատավորներ ՝ Արման Դիլանյանի (նախագահող ),
Արտակ Զեյնալյանի,
Դավիթ Խաչատուրյանի,
Երվանդ Խունդկարյանի,
Հովակիմ Հովակիմյանի,
Էդգար Շաթիրյանի,
Սեդա Սաֆարյանի,
Արթուր Վաղարշյանի,
Վլադիմիր Վարդանյանի (զեկուցող ),
մասնակցությամբ (գրավոր ընթացակարգի շրջանակներում )՝
դիմողի ՝
ներկայացուցիչ՝
Կառավարության,
ՀՀ արտաքին գործերի և միջազգային
առևտրի նախարարի տեղակալ
Վահան Կոստանյանի, հրապարակել է ՍԴ որոշումը, որով «Խաղաղության խորհրդի» կանոնադրությամբ Հայաստանի ստանձնած պարտավորությունները համապատասխանում են ՀՀ Սահմանադրությանը:

Հիշեցնենք, որ ՍԴ-ն գրավոր ընթացակարգով սեպտեմբերի 15-ին քննեց Խաղաղության խորհրդի կանոնադրության մեջ ամրագրված պարտավորությունների՝ Սահմանադրությանը համապատասխանության հարցը:

ՍԴ-ն արձանագրել է, որ Հայաստանի պարտավորություններից են Խորհրդում պետության ղեկավարի կամ Կառավարության ղեկավարի ներկայացվածությունը, Խորհրդի գործունեությանը ՀՀ ներպետական օրենսդրությանը համապատասխան աջակցելը, ինչպես նաև Խորհրդի օրակարգում ընդգրկված առաջարկների վերաբերյալ քվեարկելը։ Դրանք ներառում են նաև բյուջեի, ենթակա մարմինների ստեղծման, բարձրաստիճան պաշտոնյաների նշանակման և հիմնական քաղաքականությունների վերաբերյալ հարցերը։

Միաժամանակ, կանոնադրությունը չի նախատեսում, որ Խորհուրդը կարող է առանց Հայաստանի համաձայնության իրավազորություն իրականացնել ՀՀ տարածքում կամ Հայաստանին պարտադրել մասնակցել որևէ կոնկրետ խաղաղապահ առաքելության։

ՍԴ-ն նաև արձանագրել է, որ վարչապետ Նիկոլ Փաշինյանը կանոնադրությունը ստորագրելիս Խորհրդի նախագահին տեղեկացրել է, որ այն չի կարող ժամանակավորապես կիրառվել Հայաստանի կողմից՝ առանց ներպետական օրենսդրությամբ նախատեսված ընթացակարգերի ավարտի։

Դատարանի գնահատմամբ՝ Հայաստանի ստանձնած պարտավորությունները համահունչ են Սահմանադրությամբ ամրագրված ինքնիշխան պետության սկզբունքին և բոլոր պետությունների հետ բարիդրացիական ու փոխշահավետ հարաբերություններ հաստատելուն ուղղված արտաքին քաղաքականության նպատակներին։

ՍԴ-ի որոշումը վերջնական է և ուժի մեջ է մտնում հրապարակման պահից։

Նշվում է, որ «Խաղաղության խորհրդի» կանոնադրությունը ստորագրվել է հունվարի 22-ին՝ Դավոսում։ ՍԴ-ի որոշումից տեղեկանում ենք, որ Կառույցի հիմնադիր անդամների թիվը 28 պետություն է։

Հիշեցնենք, որ ավելի վաղ Հայաստանի կառավարությունը հավանություն է տվել «Խաղաղության խորհրդի կանոնադրությունը վավերացնելու մասին» օրենքի նախագծի վերաբերյալ օրենսդրական նախաձեռնությանը։ Գործադիրի որոշմամբ փաստաթուղթն ուղարկվելու է Սահմանադրական դատարան՝ դրանում ամրագրված պարտավորությունների համապատասխանությունը ՀՀ Սահմանադրությանը որոշելու նպատակով։