Հայտնի է, թե ինչ են քննարկել Ֆիդանն ու Բայրամովը Բաքվում

Ադրբեջանի արտաքին գործերի նախարար Ջեյհուն Բայրամովը Թուրքիայի ԱԳ նախարար Հաքան Ֆիդանի հետ համատեղ մամուլի ասուլիսի ժամանակ հայտարարել է, որ կողմերը քննարկել են տարածաշրջանային և միջազգային գործընթացները, ինչպես նաև երկու երկրների միջև հետագա համակարգման հարցերը։

Բայրամովի խոսքով՝ առանձնահատուկ ուշադրություն է դարձվել Ադրբեջանի և Թուրքիայի մասնակցությամբ գործող տարածաշրջանային համագործակցության ձևաչափերին և դրանց հետագա զարգացման հեռանկարներին։

«Հաշվի առնելով այն աշխարհագրական տարածքը, որտեղ մենք գտնվում ենք, մեր տարածաշրջանում տեղի ունեցող գործընթացները, անկայուն իրավիճակն ու գլոբալ գործընթացների հետ կապված մարտահրավերները՝ մենք չենք կարող անմասն մնալ»,- հայտարարել է Ադրբեջանի ԱԳ նախարարը։

Բանակցությունների առանձին թեմա է դարձել Վաշինգտոնի՝ անցյալ տարվա գագաթնաժողովից հետո Հարավային Կովկասում ստեղծված իրավիճակը։

«Այսօր մենք մտքեր ենք փոխանակել այն հետագա քայլերի շուրջ, որոնք Ադրբեջանն ու Թուրքիան, գործելով համակարգված, կարող են ձեռնարկել՝ մեր տարածաշրջանում խաղաղության, կայունության և բարգավաճման հաստատմանը նպաստելու համար»,- ասել է Բայրամովը։

Նրա խոսքով՝ Բաքվի և Անկարայի միջև առկա է փոխըմբռնում հետագա համակարգման և համատեղ գործունեության շարունակման վերաբերյալ։