Արտակարգ իրավիճակ՝ Երևանում․ Աջափնյակում խմելու ջուրն անխնա հոսում է առանձնատան նկուղ ու խարխլում այն․ տունը փլուզման շեմին է

Արդեն մի քանի օր է՝ Երևան քաղաքի Աջափնյակ վարչական շրջանի Առաքելյան փողոցի 18 տան սեփականատեր Ալբերտ Մանուկյանը դիմում է տարբեր պատկան մարմինների, որպեսզի գան և վերացնեն իր տան հետևում առաջացած խմելու ջրի վթարը: Հոսող ջուրն անխնա լցվում է սեփական տան նկուղները՝ խարխլելով հիմքերը, որոնք քաղաքացին նոր էր սկսել նորոգել ու ամրացնել, հաղորդում է Shamshyan.com–ը։

Կայքի հետ զրույցում Ա. Մանուկյանն ասել է.«Մոտ 20 օր առաջ փողոցում վթար կար. «Վեոլիա ջրից» երկար սպասեցնելուց հետո եկան, նորոգեցին: Դրանից հետո սկսեցի տան հիմքերն ամրացնել՝ հույս ունենալով, որ այլևս ջրերը չեն լցվի նկուղներ, և կկարողանամ աշխատանքներն ավարտին հասցնել: Սակայն աշխատանքները նոր սկսած՝ նկատեցի, որ էլի նկուղային հատվածում ջուր է կուտակվում: Փորեցի տանը կից հատվածը և տեսա, որ մոտ 2 մետր խորության վրա խմելու ջուր է դուրս գալիս, որը հավանաբար այդտեղ է լցվում փողոցի կողմից:

Սկսեցի զանգահարել թե՛ «Վեոլիա ջուր», թե՛ քաղաքապետարան, թե՛ թաղապետարան, սակայն նրանք սկսեցին պատասխանատվությունը մեկը մյուսի վրա գցել և այդպես էլ չեկան՝ տեսնեն, թե ինչ խնդիր է: Փաստացի մաքուր խմելու ջուրն անխնա հոսում է, լցվում նկուղները և տունը դարձնում վթարային:

Փրկարար ծառայությունըից եկան, զննեցին տարածքը, ասացին, որ իրենք անելիք չունեն և խորհուրդ տվեցին դուրս գալ տնից, քանի որ շենքը կարող է նստվածք տալ ու փլուզվել»:

Բնակիչները հույս ունեն, որ պատկան մարմինները վերջապես կսթափվեն, կդադարեցնեն անտարբերությունն ու անհապաղ միջոցներ կձեռնարկեն վթարը վերացնելու և քաղաքացուն անօթևան թողնելու վտանգը չեզոքացնելու համար: