Ադրբեջանում նշել են, որ ԵՄ լոբբիստները կրկին բարձրացնում են Ղարաբաղի թեման՝ Ռուբեն Վարդանյանի օրինակով

Որոշ լոբբիստական շրջանակներ Եվրամիության երկրներում, մարդասիրական հարցերի քողի ներքո, կրկին փորձում են օրակարգ բերել Ղարաբաղի թեման։

Աս մասին Բաքվում կայացած կլոր սեղանի ընթացքում հայտարարել է Միջազգային հարաբերությունների և բազմամշակութային վերլուծության կենտրոնի  խորհրդի նախագահ Ֆարիդ Շաֆիևը։ 

Նրա խոսքով՝ Եվրամիության ներսում գոյություն ունի լոբբիստների և  հանրային շահերի պաշտպանության ներկայացուցիչների բավական ընդարձակ ցանց, որոնք փորձում են կրկին բարձրացնել Ղարաբաղի թեման։

Շաֆիևն ընդգծել է, որ Ադրբեջանը պետք է զգոնություն պահպանի, քանի որ գոյություն ունեն ուժեր, որոնք շահագրգռված են խոչընդոտելու Ադրբեջանի և Հայաստանի միջև խաղաղության գործընթացին։

Որպես օրինակ նա նշել է Ռուբեն Վարդանյանին՝ ընդգծելով, որ տարօրինակ էր տեսնել նրա անունը Վացլավ Հավելի անվան մրցանակի թեկնածուների ցանկում։

Նա նշել է, որ ներկայում Հարավային Կովկասում աշխարհաքաղաքական իրավիճակը էապես փոխվել է, իսկ հայ-ադրբեջանական հակամարտությունն ավարտվել է, և կողմերը խոսում են խաղաղության մասին։