Այդտեղ պետք է սովորի այն մարդը, ով որոշում ունի, որ պրոֆեսիոնալ կերպով զբաղվելու է այդ գործով

Նիկոլ Փաշինյանը Կառավարությունում հանդիպում է ունեցել ՆԳՆ կրթահամալիրի փրկարար ծառայության և ճգնաժամային կառավարման ուսումնական ստորաբաժանման ուսանողների հետ:

Հանդիպմանը մասնակցել է նաև Ներքին գործերի նախարար Արփինե Սարգսյանը:

Նիկոլ Փաշինյանը ողջունել է ներկաներին և Փրկարարի օրվան ընդառաջ՝ ի դեմս ներկաների, շնորհավորել տոնի առիթով:

Հանդիպման ընթացքում քննարկվել են արտակարգ իրավիճակների կանխարգելման, հետևանքների վերացման և քաղաքացիական պաշտպանության ապահովմանը վերաբերող հարցեր: Անդրադարձ է կատարվել փրկարարի աշխատանքի գրավչության բարձրացմանը միտված քայլերին, ինչպես նաև այդ ուղղությամբ Կառավարության կողմից վարվող քաղաքականությանը:

Կրթության ոլորտում տեղի ունեցող փոփոխությունների համատեքստում վարչապետն ընդգծել է, որ փրկարար ծառայության ոլորտում ևս քաղաքականության փոփոխության անհրաժեշտություն կա, սկսած՝ սոցիալական երաշխիքներից մինչև ատեստավորման համակարգի ներդրումը, որն իր հերթին կբերի աշխատավարձերի, փրկարարի աշխատանքի գրավչության բարձրացմանն ու կմոտիվացնի ուսանողներին: «Դա է, որ ուսանողին դարձնելու է ավելի մոտիվացված, որ իմանա՝ սա աշխատանք է, որը կյանքում իրեն ապահովելու է, լավ պրոֆեսիոնալ լինելու դեպքում՝ ապահովելու է կարիերայի առաջընթաց, բայց նաև սոցիալական որոշակի ապահովություն իր և իր ընտանիքի համար»,-ասել է երկրի ղեկավարը։

Նիկոլ Փաշինյանն անդրադարձել է Ներքին գործերի նախարարության կրթահամալիրում ակնկալվող բարեփոխումներին, որոնք ուղղված են լինելու մասնագիտական կրթության զարգացմանը. «Այդտեղ պետք է սովորի այն մարդը, ով որոշում ունի, որ ամբողջ կյանքում պրոֆեսիոնալ կերպով զբաղվելու է այդ գործով։ Մենք՝ նախ իր մասնագիտացումն ավելի կնեղացնենք, այսինքն՝ իր գործի մեջ կլինի ավելի պրոֆեսիոնալ: Եվ նաև պետությունն էլ պայմանագիր կկնքի մարդու հետ, որ եթե այդ կրթությունը ստանում եք, իհարկե, սոցիալական երաշխիքի համակարգերով, պայմանավորվում ենք, որ դուք ձեր աշխատանքային կարիերան պատկերացնում եք այս համակարգում»։

Ծառայությունները և մասնագիտական կրթությունն ավելի որակյալ դարձնելուն ուղղված մեխանիզմների ներդրման համատեքստում Նիկոլ Փաշինյանը շեշտել է. «Ես ուզում եմ վստահեցնել մեր սիրելի ուսանողներին, որ մենք ամեն ինչ անում ենք և անելու, որպեսզի փրկարարի աշխատանքը, ոստիկանի աշխատանքը լինի այնպիսին, որ մարդը հնարավորություն ունենա ինքն իր համար որոշում կայացնել, ասել՝ սա իմ կյանքի ճանապարհն է, ես պլանավորում եմ ամբողջ կյանքում զբաղվել սրանով, որովհետև դա ինձ տալու է կարիերա, դա ինձ տալու սոցիալական երաշխիք, դա ինձ տալու է հարգանք հանրության շրջանում»: