1992-93 թթ․ Թուրքիան 3 անգամ ծրագրում էր չափավոր հարված հասցնել Հայաստանին, և միայն Ռուսաստանի կոշտ արձագանքն է կանգնեցրել Թուրքիային․ Շարմազանով (տեսանյութ)

Հանրապետականը մշտապես գտել է և գտնում է, որ Ռուսաստանի՝ Հայաստանի հետ դաշնակցությունը Հայաստանի համար կենսական կարևոր է։ Այս մասին այսօր ԲՀԿ առաջնորդ Գագիկ Ծառուկյանի գործով դատական նիստի ժամանակ դատարանի բակում լրագրողների հետ զրույցում ասաց ՀՀԿ մամուլի խոսնակ Էդուարդ Շարմազանովը։ 

«Ռուսական ռազմաբազայի ներկայությունը մենք ոչ միայն պաշտպանել ենք, այլ նաև նախագահ Սերժ Սարգսյանը և ՌԴ նախագահը 2010 թվականի օգոստոսի 20-ին Երևանում կնքել են համաձայնագիր, ըստ որի՝ լրացումներ են արվել ռուսական ռազմաբազայի տեղակայման թիվ 5 արձանագրության մեջ և ոչ միայն 49 տարով երկարաձգվել է ռուսական ռազմաբազայի գործունեության ժամկետը, այլ նաև ընդլայնվել է աշխարհագրությունը։ Սերժ Սարգսյանի ջանքերով, եթե մինչև 2010 թվականը ռուսական ռազմաբազան կարող էր պաշտպանել միայն նախկին ԽՍՀՄ արտաքին սահմանները, այսինքն՝ հայ-թուրքական և հայ-իրանական սահմանները, ապա նախագահ Սարգսյանի ջանքերով ռուսական 102-րդ ռազամաբազան պարտավորություն է ստանձնել է ՀՀ ԶՈւ-ի հետ միասին պաշտպանել ամբողջ երկայնքով սահմանը։ Սա անվտանգային երաշխիք էր, որը նիկոլական իշխանությունները չօգտագործեցին նաև 2020 թվականի պատերազմի ժամանակ»,- ասաց Շարմազանովը։

Նա նշեց, որ 1992-93 թվականներին Թուրքիան 3 անգամ ծրագրում էր չափավոր հարված հասցնել Հայաստանին, և միայն Ռուսաստանի կոշտ արձագանքը և ապագայում՝ 1995-ից սկսած ռուսական ռազմաբազայի առկայությունը, կանգնեցրել է Թուրքիային այս էքսպանսիայից։ Վաղը որ ռուսական ռազմաբազան չլինի, ո՞վ է կանգնեցնելու թուրքական էքսպանսիան։ Ոչ մեկ։ Մեր նման պետությունները միայնակ չեն կարող պահպանել և պաշտպանել իրենց անվտանգությունը։ Եվրոպական երկրները չեն կարողանում, դրա համար էլ ՆԱՏՕ են մտել»,- ասաց նա։ 

Տեսանյութը՝ այստեղ