Պայմանավորվեցինք, որ առաջիկայում ես այց կունենամ Մոսկվա․ Փաշինյանը՝ Պուտինի հետ հանդիպման մասին

Իմ ընկալմամբ, ոչ ես, ոչ էլ Ռուսաստանի նախագահը նոր բան չենք ասել։ Դրական էր աշխատանքային մթնոլորտը, առաջին հերթին այն, որ մենք պայմանավորվեցինք, որ առաջիկայում ես այց կունենամ Մոսկվա և կքննարկենք, նաև աշխատանքային որոշակի պայմանավորվածություններ ձեռք բերեցինք։ Այս մասին այսօր լրագրողների հետ զրույցում ասաց Նիկոլ Փաշինյանը՝ պատասխանելով Բիշքեքում սեպտեմբերի 1-ին ՌԴ նախագահ Վլադիմիր Պուտինի հետ հանդիպման մասին հարցին։

«Մասնավորապես, գաղափար առաջացավ, որ մենք պետք է գույքագրման ենթարկենք Հայաստան-Ռուսաստան հարաբերություններ հասկացությունը՝ պատկերացնելու համար, թե դա գործնականում ինչ է նշանակում։ Այսինքն՝ ի՞նչ տողեր կան այդ ենթավերնագրի ներքո, և որ տողերն են, որի հետ կապված մենք երկուստեք ունենք նույն դիրքորոշումը, և ո՞ր տողերն են, որոնց հետ կապված մենք ունենք այլ դիրքորոշումներ, և որտե՞ղ են, որ մենք միանշանակ ունենք դրական կարծիք, որտե՞ղ են, որ մեր կարծիքները միանշանակ չեն»,-ասաց Փաշինյանը։

Խոսելով ատոմակայանի մասին՝ Փաշինյանն ասաց, որ իրենք արդեն իսկ պայմանավորվածություններ ձեռք բերել էին, որ սեպտեմբերին սպասում են «Ռոսատոմի» ղեկավար Ալեքսեյ Լիխաչովին, որպեսզի նա ներկայացնի այն առաջարկները, որ այսօր Ռուսաստանը կարող է անել Հայաստանին նոր ատոմակայանի կառուցման վերաբերյալ։

«Բայց և մենք թափանցիկ ասել ենք, որ ատոմակայանի հարցն աշխարհաքաղաքական ընտրություն չի, մեզ անհրաժեշտ է գին-որակ լավագույն հարաբերակցությունը։ Ով մեզ լավագույն առաջարկը անի, մենք գնալու ենք այդ առաջարկի հետևից»,- նշեց Փաշինյանը։

Նրա խոսքով՝ ի թիվս այլնի, քննարկվել էնաև երկաթուղու խնդիրը․ «Ըմբռնում է ձևավորվել, որ մենք պետք  է որևէ ձևով այդ հարցը լուծենք, այսինքն՝ ինձ համար ակնհայտ է, որ ընթացիկ իրավիճակը, արձանագրել ենք, որ չի կարող երկար շարունակվել և պետք է լուծումների գնանք»։