Գերմանիան Ռուսաստանին է պատասխանատու համարել Լայպցիգի միջադեպի համար և փակում է ՌԴ հյուպատոսությունը

Գերմանիան Ռուսաստանին է պատասխանատու համարել օգոստոսի 4-ին Լայպցիգի օդանավակայանում անօդաչու թռչող սարքերի մասնակցությամբ տեղի ունեցած միջադեպի համար և հայտարարել Մոսկվայի դեմ նոր միջոցների մասին։ Այս մասին հայտարարել է Գերմանիայի ներքին գործերի նախարար Ալեքսանդր Դոբրինդտը, հայտնում է DW-ն:

Նրա խոսքով՝ գերմանական իշխանությունները նման եզրահանգման են եկել ԱԹՍ-ներից մեկի կարգավորումների և դրա բաղադրիչների վերլուծությունից հետո, որոնք, ինչպես պնդվում է, նախկինում կիրառվել են հիբրիդային այլ միջադեպերում:

Ի պատասխան ձեռնարկվող քայլերի շրջանակում Գերմանիան սեպտեմբերի 18-ից փակելու է Բոննում Ռուսաստանի գլխավոր հյուպատոսությունը, ինչպես նաև Բեռլինում գործող «Ռուսական տունը»: Բացի այդ, իշխանությունները մտադիր են ուժեղացնել ՌԴ քաղաքացիների մուտքի հսկողությունն ու ռուսական «ստվերային նավատորմի» դեմ պայքարի միջոցառումները, հայտնել է Գերմանիայի արտաքին գործերի նախարար Յոհան Վադեֆուլը:

Եվրահանձնաժողովի նախագահ Ուրսուլա ֆոն դեր Լայենը հայտարարել է, որ սեպտեմբերի 2-ին միջադեպը քննարկելու է ՆԱՏՕ-ի գլխավոր քարտուղար Մարկ Ռյուտեի հետ: Նրա խոսքով՝ ԵՄ երկրների արտգործնախարարները պատրաստելու են տեղի ունեցածի պատասխանը:

Ռյուտեն իր հերթին հայտարարել է տեղի ունեցածի առնչությամբ Գերմանիայի հետ ՆԱՏՕ-ի լիակատար համերաշխության մասին՝ պատահարն անվանելով «Ռուսաստանի կողմից իրականացված հիբրիդային հարձակում»:

Միջադեպը տեղի է ունեցել օգոստոսի 4-ին Լայպցիգի օդանավակայանում: Գերմանական ԶԼՄ-ների տվյալներով՝ քննությունը դիտարկում է ուկրաինական «Ան-124» բեռնատար ինքնաթիռի վրա հարձակման փորձի վարկածը: Պայթուցիկով բեռնված անօդաչու սարքերից մեկը հայտնաբերվել էր ուկրաինական բեռնատար օդանավերի հարևանությամբ, իսկ մյուսը, ենթադրաբար, բախվել էր DHL ընկերության բեռնատար ինքնաթիռին:

Ավելի վաղ Դոբրինդտը չէր բացառել, որ հարձակման ետևում կարող է կանգնած լինել օտարերկրյա պետություն: Գերմանիայի կանցլեր Ֆրիդրիխ Մերցը հայտարարել էր, որ մեղավորները պատիժ են կրելու: