Մարիա Զախարովան կոչ է արել բարելավել Ռուսաստանի և Հայաստանի հարաբերությունները

Ռուսաստանի և Հայաստանի միջև հարաբերությունները պետք է լինեն լավագույնը՝ նույնիսկ գերազանցելով փաստաթղթերում պաշտոնապես նկարագրված մակարդակը, հայտարարել է ՌԴ ԱԳՆ պաշտոնական ներկայացուցիչ Մարիա Զախարովան։

«Մեր երկրների միջև պետք է լինեն լավագույն հարաբերությունները։ Որպեսզի դրանք լինեն ամենաբարձր մակարդակի, նույնիսկ գերազանցեն պաշտոնապես նկարագրվածը։ Ինչո՞ւ։ Դրա համար կա պատմական՝ բազմադարյա հիմք, կա մշակութային մերձություն, այդ թվում՝ կրոնական հայացքների ոլորտում»,- ասել է Զախարովան։

Դիվանագետն ընդգծել է, որ այս գործում կարևոր դեր պետք է ունենա երկու երկրների երիտասարդությունը։ «Նրանք կարող են լինել մեր երկրների միջև խաղաղ համակեցության և բարեկամության, լավագույն հարաբերությունների զարգացման կողմնակիցները»,- նշել է նա։

ՌԴ ԱԳՆ պաշտոնական ներկայացուցիչը հավելել է, որ երկկողմ հարաբերություններն ունեն նաև ժամանակակից հիմք՝ երկու երկրների քաղաքացիների միջև ստեղծված հսկայական թվով ընտանիքներ:

«Ծնվել են սերունդներ, որոնք իրենց չեն տարանջատում երկու երկրների մշակույթներից և իրենց համարում են երկու ժողովուրդների, երկու մշակույթների զավակներ։ Հազարավոր մարդիկ կան, որոնք չեն կարող և չեն ցանկանում ասել, որ իրենց համար այս կամ այն երկիրն ավելի քիչ կարևոր է»,- եզրափակել է Զախարովան։