«Կարևոր տեղ էր հատկացված ազգային արժեքներին». Շիրակի թեմի Երիտասարդաց միությունը կազմակերպել էր ուխտագնացություն դեպի Գեղարքունյաց թեմ

Շիրակի թեմի առաջնորդ Գերաշնորհ Տեր Միքայել արքեպիսկոպոս Աջապահյանի օրհնությամբ և առաջնորդությամբ՝ Շիրակի թեմի Երիտասարդաց միությունը կազմակերպել էր ուխտագնացություն դեպի Գեղարքունյաց թեմ՝ համախմբելով ավելի քան 110  երիտասարդների:

Օրվա առաջին հանգրվանը Հայրավանքն էր։ Այստեղ երիտասարդները մասնակցել են միասնական ժամերգության՝ գլխավորությամբ Շիրակի թեմի Արժանապատիվ Տեր Մակար քահանա Գալամդարյանի, Արտաշես և Վահան սարկավագների։ Սևանա լճի ափին գտնվող Հայրավանքը դարերի պատմություն ունեցող հոգևոր կենտրոն է, և սրբավայրի խաղաղ միջավայրը յուրահատուկ խորհուրդ հաղորդեց ուխտավորների աղոթքին։

«Հայրավանքից հետո ուխտավորները շարունակեցին ճանապարհը դեպի Վանեվանք, որտեղ ևս մեկ անգամ համախմբվեցին միասնական աղոթքի շուրջ։

Ուխտագնացության կարևորագույն բաղադրիչներից էր նաև երիտասարդների անմիջական շփումը Շիրակի թեմի առաջնորդ Գերաշնորհ Տեր Միքայել արքեպիսկոպոս Աջապահյանի հետ։ Երիտասարդները հնարավորություն ունեցան Սրբազան Հորը ուղղել իրենց հուզող հարցերը, բարձրաձայնել իրենց մտքերն ու մտահոգությունները և ստանալ Հայրական խորհուրդներ։

Վանեվանքի բակում կազմակերպվեց նաև սիրո ճաշ, որը դարձավ օրվա ջերմ ու խորհրդանշական դրվագներից մեկը։ Քրիստոնեական համայնքի կյանքում միասին ճաշելը ոչ միայն ընկերական շփման, այլև միմյանց հանդեպ սիրո, հոգատարության և միասնության արտահայտություն է։

Օրվա հոգևոր ընթացքին զուգահեռ կարևոր տեղ էր հատկացված նաև ազգային արժեքներին: Ուխտագնացության անբաժան մասն էին կազմում ազգային երգն ու պարը։

Երիտասարդական ուրախությունն ու ընկերական շփումը շարունակվեցին նաև Սևանա լճի ափին, որտեղ մասնակիցները հնարավորություն ունեցան հանգստանալու, զրուցելու և միասին անցկացնելու օրվա վերջին հատվածը։ Հոգևոր ապրումներին, աղոթքին ու զրույցներին միացավ նաև հետաքրքիր ժամանցը՝ ստեղծելով ամբողջական և հիշարժան օր։

Սրբազան Հոր կողմից երիտասարդներն ունեին նաև հյուրասիրություն, որը ճաշակեցին Սևանա լճի հարակից տարածքում:

Շիրակի թեմի Երիտասարդաց միության համար նման նախաձեռնությունները նաև երիտասարդների հետ շարունակական աշխատանքի կարևոր ուղղություններից են։ Դրանք նպաստում են Եկեղեցու և երիտասարդների միջև կապի ամրապնդմանը, երիտասարդների հոգևոր կյանքի զորացմանը, ազգային ու քրիստոնեական արժեքների առավել խոր ընկալմանը և միմյանց հանդեպ պատասխանատվության ու հոգատարության ձևավորմանը»,- ասվում է հաղորդագրությունում։