Newspress.am կայքը դատի կտա armlur.am-ի Թագուհի Թովմասյանին

Newspress.am կայքը ապրիլյան ռազմական էսկալացիայի հենց առաջին իսկ օրվանից ԵԿՄ–ի հետ պայմանավորվածություն ձեռք բերեց, և մինչ օրս newspress.am-ի թղթակիցը ԵԿՄ-ի հետ աշխատում է առաջնագծում, և ամենավտանգավոր հատվածներից տեղեկություն հասցնում հասարակությանը, զինվորի ընտանիքին:

Newspress.am կայքը այս աշխատանքի ետևում չփորձեց խնդիր դնել առաջինը լինելու, փոխարենը իրենց առաջինը համարող շատ ու շատ լրատվական կայքեր Newspress-ի թղթակից Անի Գևորգյանի ռեպորտաժները առանց ամոթի դարձրին սեփականն ու տեղադրեցին իրենց կայքում`անգամ հղում չանելով Newspress.am կայքին: Երբ վտանգված է երկրի անվտանգությունը, կարծես թե ճղճիմ մրցավազքը պետք է մնա ետևում: Բայց ցավոք, ինչպես մեր երկրի իշխանութունն ու ընդիմությունն են, այնպես էլ նրանց սպասարկող լրատվամիջոցներն են` սկզբունքը նույնն է, գողանալ ուրիշի վաստակը և իրական վաստակողին գող անվանել:

Հենց այսպիսի մի երևույթի ականատես եղանք «Երկիր մեդիա» հեռուստաընկերության մի հաղորդման ժամանակ, երբ Գեղամ Մանուկյանի հյուրերը տարբեր լրատվամիջոցների ղեկավարներ էին` և ընդդիմադիր, և իշխանամետ: Թվում է, թե ընդդիմադիր լրատվամիջոցի ղեկավարը, այս պարագայում armlur.am կայքի ղեկավար Թագուհի Թովմասյանը, ով այս օրերին առանց վարանելու և հղումի իր կայքում տեղադրում էր Newspress.am-ի թղթակից Անի Գևորգյանի Արցախի առաջնագծից արված ռեպորտաժները, պետք է շնորհակալություն հայտնի Newspress.am կայքին, ում աշխատողի հաշվին Թագուհի Թովմասյանի armlur-ը լայքեր է հավաքել: Բայց ոչ, Թագուհի Թովմասյանը դեռ մի բան էլ «Երկիր մեդիայի» եթերից Newspress.am կայքին գող անվանեց, թե իբր Newspress.am-ը իրենցից նյութեր է գողանում. «Գալիս էի այստեղ, իմ գործընկերը զանգահարեց և շատ վրդովված ասաց` կա ինչ-որ Newspress, թե ինչ-որ Newspress.com անունով կայք, գողացել ա մեր նյութը, ու ես չեմ կարող գտնել, թե ովքեր են իրենք»,- «գործի բերմամբ մեզանից ավելի շատ են գողանում»,- Թագուհու խոսքը չժխտելով հավելեց Արմենպրես գործակալության ղեկավար Արամ Անանյանը:

Այստեղ տեղին է հիշել ասացվածքը` «հավը երազում կորեկ է տեսնում»: Ամենափոքր ջանք գործադրելու դեպքում հնարավոր է կապ հաստատել Newspress.am կայքի հետ ի տարբերություն Թագուհի Թովմասյանի, ում ղեկավարած կայքը գողանալով Newspress.am առաջնագծից արված ռեպորտաժները` անցնում էր ընդհատակ. կամ քնի ժամն էր, կամ տեղում չէր: Արմենպրեսի մասին խոսելն էլ ավելորդ է, այնտեղ պետք է ուղղակի լուրջ քննություն անցկացնել հասկանալու համար, թե տվյալ գործակալությունը ուրիշներին գող անվանելուց բացի ինչպես է ծախսում պետական բյուջեից հատկացվող տարեկան 100 մլն դրամը: Այն, որ Newspress.am-ը իր որակով, իր օբյեկտիվությամբ այսօր դարձել է մի մեծ ոսկոր ու կանգնել իրենց ընդդիմադիր, կամ առաջատար, կամ պետական համարող կայքերի կոկորդին, և որ այդ կայքերի տերերն ու ծառաները հայտնվել են լուրջ ընկճախտի մեջ, ինքնին տեսանելի է:

Սակայն անառողջ մրցավազքը և չհիմնավորված մեղադրանքը գործընկերոջ հանդեպ վկայում է մի փաստ` պայթում է փուչիկը և մրցավազքից դուրս են մնում իրենց առաջատար հորջորջողները:

Newspress.am-ը կողջուներ armlur-ին ու նրա ղեկավարին, որոշ գործընկերներին, եթե տեսներ, որ այդ կայքերը օբյեկտիվ են ոչ միայն ի սկզբանե նախանշված որոշ մարդկանց քննադատության հարցում, այլև իրենք իրենց նկատմամբ: Բայց քանի դեռ ջայլամային քաղաքականությունը որոշ կայքերի գործելաոճն է, ուստի Newspress.am-ը կդիմի դատարան Թագուհի Թովմասյանի կողմից իրեն գող անվանելու համար:

Մեկ օրինակ, որ առաջնագծում աշխատում է Newspress.am-ի թղթակից Անի Գևորգյանը, ու պատրաստած ռեպորտաժը որպես սեփական տեսանյութ armlur.am-ը տեղադրել է իր կայքում՝  http://armlur.am/512682/: