Ֆրանսիայի դեսպանատանը 12 մարդ վարակվել է. նախարարությունը բացահայտեց, որ 7-ի մոտ հայտնաբերվել է Salmonella spp. «Ժողովուրդ»

«Ժողովուրդ» օրաթերթը գրում է.

«Ֆրանսիայի Հանրապետության Ազգային տոնի՝ հուլիսի 14-ին կազմակերպված պաշտոնական ընդունելությունից հետո արձանագրված զանգվածային հիվանդացության դեպքի վերաբերյալ «Ժողովուրդ» օրաթերթի հարցմանն ի պատասխան՝ ՀՀ առողջապահության նախարարությունը նոր մանրամասներ է հայտնել։ Պաշտոնական պատասխանից պարզ է դառնում, որ խոսքը ոչ թե սննդային թունավորման, այլ նախնական ախտորոշմամբ «Սուր գաստրոէնտերիտ» կամ «Սուր աղիքային վարակ» դեպքերի մասին է, իսկ լաբորատոր հետազոտությամբ հիվանդներից 7-ի մոտ հայտնաբերվել է Salmonella spp.։

«Ժողովուրդ» օրաթերթը դիմել էր ՀՀ առողջապահության նախարարությանը՝ պարզելու, թե քանի մարդ է տուժել, ինչ ախտանշաններ են արձանագրվել, ինչ հետազոտություններ են իրականացվել և ինչ փուլում է գտնվում քննությունը։

Նախարարությունը, ի պատասխան մեր հարցման, նախ հստակեցնում է, որ «Բուժհաստատություններից ստացվել է ոչ թե սննդային թունավորման, այլ «Սուր գաստրոէնտերիտ» կամ «Սուր աղիքային վարակ» նախնական ախտորոշումներով 12 շտապ հաղորդում»։

Նախարարության փոխանցմամբ՝ հիվանդների մոտ արձանագրվել են աղիքային վարակի բնորոշ ախտանշաններ։

«Բուժառուների մոտ արձանագրվել են լուծ, փսխում, մարմնի ջերմաստիճանի բարձրացում, ջրազրկում, ուշագնացություն, մկանային ցավ, ընդհանուր թուլություն»։

Առողջապահության նախարարությունը հայտնում է նաև, որ 12 տուժածներից 4-ը տարբեր ժամկետներով հոսպիտալացվել են, սակայն այսօրվա դրությամբ բոլորն արդեն դուրս են գրվել բուժհաստատություններից։

«Բուժհաստատություններից ստացվել է նշված միջոցառման հետ կապված ընդհանուր թվով 12 շտապ հաղորդում, որոնցից 4-ը հոսպիտալացվել են տարբեր ժամկետներով։ Բոլոր հոսպիտալացված հիվանդները 24.07.2026 թվականի դրությամբ դուրս են գրվել բուժհաստատություններից»։

Պարզվում է նաև, որ բոլոր 12 դեպքերի վերաբերյալ իրականացվել է համաճարակաբանական հետազոտություն, սակայն նախարարությունը չի մանրամասնում դրա արդյունքները։

Մեր հարցին, թե որ կազմակերպությունն է պատրաստել կամ մատակարարել միջոցառման սնունդը, նախարարությունը փաստացի պատասխան չի տալիս՝ նշելով, որ նման տեղեկատվության չի տիրապետում։

«ՀՀ ԱՆ «Հիվանդությունների վերահսկման և կանխարգելման ազգային կենտրոն» ՊՈԱԿ-ը պաշտոնական տեղեկատվությանը չի տիրապետում»։

Միաժամանակ, բուժառուների ցուցմունքների հիման վրա նախարարությունը ներկայացրել է այն սննդատեսակները, որոնք առավել հաճախ օգտագործել են հիվանդացած անձինք։

«Բուժառուները առավել հաճախ նշում են, որ օգտագործել են հետևյալ սննդատեսակները՝ հավի միս, սաղմոն, շաուրմա, խոզի միս, ելակ, պաղպաղակ, կոկտեյլ»։

Թե կոնկրետ այս սննդատեսակներից որն է եղել վարակի աղբյուրը, առայժմ հայտնի չէ։ Սակայն նախարարության պատասխանում ամենաէական բացահայտումը վերաբերում է լաբորատոր հետազոտությունների արդյունքներին։

«Բուժառուներից վերցված կենսանյութերի լաբորատոր հետազոտությունների արդյունքում 12 հիվանդից 7-ի մոտ հայտնաբերվել է Salmonella spp.»։

Այսինքն՝ հիվանդների կեսից ավելիի մոտ արդեն հաստատվել է սալմոնելայի առկայությունը, ինչը կարող է կարևոր նշանակություն ունենալ վարակի աղբյուրը պարզելու հետագա աշխատանքներում։

Միաժամանակ, նախարարությունը հրաժարվել է պատասխանել մեր մի շարք առանցքային հարցերին՝ նշելով, որ դրանք դուրս են իր լիազորությունների շրջանակից։ Խոսքը վերաբերում է, մասնավորապես, այն հարցերին, թե՝

իրականացվել են արդյոք սննդամթերքի, ջրի, հումքի կամ աշխատակիցների նմուշառումներ,
հայտնաբերվե՞լ են արդյոք սանիտարահիգիենիկ խախտումներ,
կասեցվել է արդյոք սնունդ մատակարարած կազմակերպության գործունեությունը,
ինչ արդյունքներ են տվել ՍԱՏՄ-ի ստուգումները։

Այս բոլոր հարցերով նախարարությունը խորհուրդ է տվել դիմել Սննդամթերքի անվտանգության տեսչական մարմնին։ Անշուշտ, դիմել ենք։

Այսպիսով, պաշտոնական պատասխանից արդեն պարզ է դառնում, որ Ֆրանսիայի Հանրապետության Ազգային տոնի պաշտոնական ընդունելությունից հետո արձանագրված դեպքը սահմանափակվել է ոչ թե մեկ կամ երկու անձով, այլ առնվազն 12 հաստատված հիվանդացության դեպքով, որոնցից 7-ի մոտ լաբորատոր հետազոտությամբ հայտնաբերվել է Salmonella spp.։ Սակայն մինչ օրս բաց է մնում ամենակարևոր հարցը՝ ո՞ր սննդամթերքն է եղել վարակի աղբյուրը։

Արդյոք «Մարրիոթ Արմենիա» հյուրանոցային ցանցի նկատմամբ կիրառվել է որևէ սահմանափակում կամ պատասխանատվության միջոց»։

Մանրամասները՝ «Ժողովուրդ» օրաթերթի այսօրվա համարում: