Անչափահասի հնարավոր սեռական շահագործման գործով NEWSPRESS-ի բացահայտումից հետո ՔԿ-ն քրեական վարույթ է նախաձեռնել

Անչափահասի հնարավոր սեռական շահագործման վերաբերյալ ստացված հաղորդման հիման վրա նախաձեռնվել է քրեական վարույթ։ Այս մասին NEWSPRESS.am-ի հարցմանն ի պատասխան հայտնել է ՀՀ Քննչական կոմիտեի նախագահի մամուլի քարտուղար Կիմա Ավդալյանը։

Հիշեցնենք, որ օրեր առաջ NEWSPRESS.am-ի հիմնադիր-տնօրեն Արիանա Հովսեփյանը ֆեյսբուքյան իր էջում հրապարակել էր տեսանյութ։

NEWSPRESS.am-ի փոխանցմամբ՝ Հովսեփյանին ուղարկված տեսանյութում երևացող կնոջը, ըստ աղբյուրի, որդեգրել է նույն տեսանյութում պատկերված երեխային։ Կայքի տեղեկություններով՝ կինը երեխային ենթադրաբար ներգրավել է սեռական բնույթի բովանդակություն պարունակող տեսանյութերի ստեղծման մեջ՝ դրանք տարածելու և եկամուտ ստանալու նպատակով։

Մեր տեղեկություննեով, խոսքը Արաքսյա Մուրադյանի մասին է, որը բնակվում է Նորագյուղում։

Միաժամանակ շրջանառվում են լուրեր, որ տվյալ երեխան հնարավոր տուժողներից միակը չէ, սակայն այս տեղեկությունները պաշտոնապես չեն հաստատվել։

Հրապարակված տեսանյութին արձագանքել էր  ՀՀ ներքին գործերի նախարարության խոսնակ Նարեկ Սարգսյանը՝ տեղեկացնելով, որ նախարարությունն ուսումնասիրել է հրապարակումը և համապատասխան հաղորդումն ուղարկել ՀՀ Քննչական կոմիտե՝ իրավական ընթացակարգերն ապահովելու և ներկայացված հանգամանքները բազմակողմանի քննության առարկա դարձնելու նպատակով։

Գործի ընթացքի վերաբերյալ NEWSPRESS.am-ի հարցմանն ի պատասխան Քննչական կոմիտեից հայտնել են.

«Ստացված հաղորդման առթիվ նախաձեռնվել է քրեական վարույթ՝ ՀՀ քրեական օրենսգրքի 199-րդ հոդվածի 3-րդ մասի 2-րդ կետով (սեքսուալ բնույթի գործողություններին հարկադրելը, որը կատարվել է 16 տարին չլրացած անձի նկատմամբ), 200-րդ հոդվածի 3-րդ մասի 1-ին կետով (սեքսուալ բնույթի գործողություններ կատարելը 16 տարին չլրացած անձի նկատմամբ), ինչպես նաև 201-րդ հոդվածի 3-րդ մասի 2-րդ կետով (անառակաբարո արարք կատարելը 12 տարին չլրացած անձի նկատմամբ)»։