Աղոթում ենք Հայաստանի և Ամենայն հայոց կաթողիկոսի համար․ մետրոպոլիտ Անտոնիոս

Մոսկվայի և Համայն Ռուսիո Կիրիլ պատրիարքի հրավերով Մոսկվայում գտնվող Ղպտի եկեղեցու պատվիրակությունը հուլիսի 21-ին եղբայրական այցով այցելեց Մոսկվայի հայկական եկեղեցի։ Այս մասին տեղեկանում ենք Հայ Առաքելական Ուղղափառ Եկեղեցու Ռուսաստանի և Նոր Նախիջևանի թեմից։

Եզրաս եպիսկոպոսը հյուրերին ներկայացրեց թեմի հոգևոր, կրթական և մշակութային գործունեությունը: Հատուկ ուշադրություն դարձնելով թանգարանում ցուցադրվող Ղպտի եկեղեցու ծիսական առարկաներին և մասունքներին՝ եպիսկոպոսը նշեց. «Դարեր շարունակ մեր երկու քույր եկեղեցիները պատմության միջով անցել են՝ միավորված Եկեղեցու հավատքի մեջ, և Ձեր այսօրվա այցը նաև մեր հավատարմության և եղբայրության վկայությունն է: Մենք մեր երախտագիտությունն ու սերն ենք հայտնում Ղպտի Ուղղափառ Եկեղեցու առաջնորդին և նրա բարեպաշտ հավատացյալներին և հայտարարում ենք մեր պատրաստակամությունը միասին հաղթահարել մեր ժամանակների դժվարությունները, հալածանքներն ու մարտահրավերները»:

Թանգարանում հյուրերը հետաքրքրությամբ ուսումնասիրեցին Արցախի բնակավայրերի քարտեզը, որի վրա պատկերված են հայկական տեղանուններն ու եկեղեցիները հայերեն և ռուսերեն լեզուներով, որոնք ներկայումս անողոք կերպով ոչնչացվում են ադրբեջանական իշխանությունների կողմից: «Մենք աղոթում ենք Հայաստանի և Ամենայն հայոց կաթողիկոսի համար՝ խնդրելով Տիրոջը խաղաղություն շնորհել այս օրհնյալ երկրին»: «Մենք նաև աղոթում ենք ձերբակալված եպիսկոպոսների համար և աղոթքներ ենք անում խաղաղության համար: Մենք աղոթում ենք, որ քրիստոնյաները այլևս չենթարկվեն հալածանքների», – ընդգծեց մետրոպոլիտ Անտոնին:

Եկեղեցական համալիր այցելությունից ստացած իր տպավորությունների մասին խոսելով՝ Մետրոպոլիտը մեզ հետ զրույցում նշեց. «Ես տպավորված և հիացած եմ Մոսկվայի հայկական եկեղեցական համալիրի գեղեցկությամբ և ճարտարապետությամբ, դրա վեհությամբ։ Ես զարմացած եմ Եզրաս եպիսկոպոսի հսկայական աշխատանքով, որը համեմատաբար կարճ ժամանակում կարողացավ կառուցել այս տաճարը և հոյակապ եկեղեցական համալիրը, որը դարձել է ռուսահայերի հոգևոր կյանքի կենտրոնը։

Սա ևս մեկ անգամ վկայում է այն մասին, որ Եզրաս եպիսկոպոսն ամբողջությամբ նվիրվել է Աստծուն ծառայելուն, և որ Սուրբ Հոգին գործում է նրա միջոցով։ Այս ամենը կառուցվել է մարդկային հոգիների փրկության համար»։

Հանդիպման ավարտին փոխանակվեցին հուշանվերներ։