Ցավն ահռելի է, և ժամանակ կպահանջվի այս վերքը բուժելու համար․ Մեսսին դիմել է երկրպագուներին

Արգենտինայի հավաքականի ավագ Լիոնել Մեսսին ԱԱ-2026-ի եզրափակչում կրած ցավալի պարտությունից հետո առաջին անգամ դիմել է երկրպագուներին՝ շնորհակալություն հայտնելով մրցաշարի ողջ ընթացքում ցուցաբերած աջակցության համար։

Հիշեցնենք, որ տիտղոսի համար մղվող վճռորոշ հանդիպման լրացուցիչ ժամանակում Արգենտինայի ընտրանին 0:1 հաշվով զիջեց Իսպանիայի հավաքականին: 39-ամյա Մեսսին 12 միավորով (8 գոլ և 4 գոլային փոխանցում) դարձավ արգենտինացիների կազմում մրցաշարի ամենաարդյունավետ ֆուտբոլիստը:

«Ցավն ահռելի է, և ժամանակ կպահանջվի այս վերքը բուժելու համար։ Բայց ես նախընտրում եմ հիշողությանս մեջ պահել միայն լավը՝ այն հանդիպումները, որտեղ մենք հետ բերեցինք կորցրածը՝ ներդնելով մեր ողջ ուժերը։ Ես միշտ կհիշեմ ողջ երկրի աջակցությունը, որն այս թիմի տքնաջան աշխատանքի և ջանքերի հետ մեկտեղ թույլ տվեց մեզ կրկին լինել աշխարհի լավագույնների շարքում։

Այսօր դժվար է լիարժեք գիտակցել մեր ձեռքբերումները, բայց այս թիմը հասավ աշխարհի առաջնության երկու անընդմեջ եզրափակիչ։

Ի սրտե շնորհակալ եմ ձեր յուրաքանչյուր հաղորդագրության և ցուցաբերած անսահման աջակցության համար։ Մեզ հերթական անգամ հաջողվեց համախմբվել որպես երկիր և միասին կանգուն մնալ՝ կիսելով այն հսկայական հպարտությունը, որ մենք արգենտինացի ենք։

Ցանկանում եմ նաև շնորհավորել Իսպանիային՝ աշխարհի չեմպիոնի տիտղոսը նվաճելու կապակցությամբ»,- գրել է Մեսսին իր սոցցանցերում։

Նշենք, որ Արգենտինայի հավաքականի կազմում Լիոնել Մեսսին աշխարհի չեմպիոն էր հռչակվել 2022 թվականին՝ Կատարում կայացած Մունդիալում։