ՊՆ-ի ձեռքում նոր փաստաթղթեր են հայտնվել

Ադրբեջանական խփված ուղղաթիռի օդաչուն թռիչք է իրականացրել 54 նշանակետի ուղղությամբ։1

68.am-ի փոխանցմամբ, այդ մասին ասել էՀՀ Զինված ուժերի ավիացիայի վարչության պետ, գեներալ-մայոր Ավետիք Մուրադյանը՝ ներկայացնելով հայկական կողմի կողմից խոցված ադրբեջանական ՄԻ-24G ուղաթիռից վերցված փաստաթղթերը:

Նրա խոսքով, օդաչուներից մեկի մոտից վերցված գրքույկում արված են գրառումներ, որը արվել է մարտի 31-ին. «Սեւ արկղը դեղին գույնի է: Գրված է՝ օդաչուն պետք է իրականացնի Թռիչք Բաքվի տարածքում գտնվող Կալա օդանավակայանից վերաթռիչք դեպի Քյուրդանի ռազմական օդանավակայան: Գրված է, որ ինքn իրականացրել է շարժիչների երկու թողարկում՝ մեկը 6 րոպե, մյուսը՝ 11 րոպեի ընթացքով, ընդհանուր ծախսել է 148 լիտր ավիոկերասին:

Հետագայում իրականացրել է վերաթռիչք դեպի Քյուրդամիր օդանավակայան՝ ընդհանուր 60 րոպե ժամանակահատվածով: Ավիոկերսինի ընդհանուր ծախսը կազմել է 798 լիտր ու սկսել են պատրաստվել հաջորդ օրվա թռիչքին: Հաջորդ օրվա թռիչքը նախատեսված է եղել ռազմական օդանավակայանից իրականացնել վերաթռիչք Ժդանովսկ քաղաքի մոտ, որը, ըստ օդաչուական կանչի, կոչվել է Բեյլադան»,- ասել է Մուրադյանը՝ նկատելով, թե տվյալ թռիչքի ընդհանուր ժամանակահատվածը կազմել է 35 րոպե:

Ներկայացնելով հակառակորդի կողմից կիրառված քարտեզը՝ Ավետիք Մուրադյանն ասաց, որ օդաչուն նախօրոք՝ թռիչքից առնվազն 1-2 օր առաջ, ստացել է խնդիրներ՝ մարտական թռիչք իրականացնելու համար: Մարտական քարտեզի վրա ցույց են տրվել հավանական հակառակորդի առաջնագիծը, ցույց են տրված ԼՂՀ տարածքում 9 նշանակետեր, ամենահեռահար նշանակետը՝ Ֆիզուլի քաղաքի հարավ-արեւելյան մասում. «Ես՝ որպես օդաչու, ձեզ կարող եմ զեկուցել, որ տվյալ նշանակետերի կատարումը պետք է իրականացվեր ըստ հերթականության՝ ելնելով օրվա խնդրի կատարումից: Որպես առաջին խնդիր տրված է եղել առաջնագծից մինչեւ 3 կմ խորությամբ, հետագա խնդիրների կատարման նպատակով՝ ցամաքային զորքերի համար օրվա խնդիր՝ մինչեւ 10 կմ խորութամբ»:

Քարտեզը, ըստ նրա, պատրաստված է նախօրեին՝ կամ մարտի 31-ին, կամ ապրիլի 1-ին. «Հակառակորդը՝ թշնամին, բանակային ավիացիայի օդաչուներին խնդրավորել է պատրաստվել եւ պատրաստ լինել ապրիլի 1-ից 2-ի գիշերը լույս առավոտ բանակային ավիացիայի կիրառմամբ իրականացնել հարձակողական գործողություններ՝ Լեռնային Ղարաբաղի՝ տվյալ պարագայում հարավ-արեւելյան մասով: Ապացույց, որը, իմ կարծիքով, ցանկացած ռազմական մասնագետը կընդունի որպես իրողություն ու կհասկանա, որ տվյալ կողմն իրականացրել է մարտական գործողությունների մշակում, իրականացրել է օդաչուական անձնակազմի մարտական խնդիրների տեսակետից նախորոշում եւ նշանակետերի կոնկրետ ցուցում»:

Նրա խոսքով՝ թշնամի օդաչուն թռիչք է իրականացրել 54 նշանակետի ուղղությամբ:

Կարելի է վստահաբար ասել, որ օդաչուն թռիչքը շատ լարված վիճակում է իրականացրել, որի արդյունքում ունենալով կառավարվող հակատանկային միջոցներ, ցամաքային զորքերի դեմ կիրառվող միջոցներ, չի կիրառել, կիրառել է միայն թնդանոթը:

«Կիրառելով թնդանոթը՝ ձգանը սեղմած պահել է մոտավորապես երկու րոպե ժամանակահատվածով: Ու այդպես սեղմած վիճակով ուղղաթիռը խոցվել է մեր տղաների կողմից»,- ասաց Ավետիք Մուրադյանը:

Ավետիք Մուրադյանի խոսքով՝ խոցված ուղղաթիռը ՌԴ ՄԻ-24 տիպի ուղղաթիռի մոդեռնիզացված տարբերակն է, մոդեռնիզացվել է Հարավաֆրիկյան Հանրապետությունում, որոշակի մասերով մոդեռնիզացված է Ուկրաինայի Հանրապետության կողմից: Այն հնարավորություն ունի կիրառել հակատանկային միջոցներ, կիրառել ոչ կառավարվող ավիացիոն հրթիռներ:

Առավել մանրամասն սկզբնաղբյուր կայքում: