Էլէներգիայի մատակարարման և տարանցման 20-ամյա համաձայնագիր է կնքվել Վրաստանի ու Ադրբեջանի միջև

«Վրացական երազանք»-ի վարչապետ Իրակլի Կոբախիձեի նոր որոշման համաձայն՝ մայիսի 18-ին Վրաստանի և Ադրբեջանի միջև ստորագրված Էլեկտրաէներգիայի մատակարարման և տարանցման համաձայնագիրը ուժի մեջ կմտնի։ Ադրբեջանի նախագահ Իլհամ Ալիևը համապատասխան հրամանագիրն արձակել է մի քանի օր առաջ՝ հուլիսի 9-ին։ Փաստաթղթի համաձայն՝ արտաքին գործերի նախարարությունը պետք է տեղեկացնի ադրբեջանական կողմին համաձայնագրի ուժի մեջ մտնելու մասին, նաև արտաքին գործերի նախարարությունը պետք է հայտնի Վրաստանի խորհրդարանին և նախագահին համաձայնագրի կնքման վերաբերյալ։

««Վրաստանի միջազգային պայմանագրերի մասին» Վրաստանի օրենքի 18-րդ հոդվածի համաձայն, ուժի մեջ մտնելու նպատակով պետք է հաստատվի 2026 թվականի մայիսի 18-ին ստորագրված «Վրաստանի կառավարության և Ադրբեջանի Հանրապետության կառավարության միջև Վրաստանին էլեկտրաէներգիայի մատակարարման և Վրաստանի տարածքով էլեկտրաէներգիայի տարանցման մասին» համաձայնագիրը։

Վրաստանի արտաքին գործերի նախարարությունը.

ա) պետք է տեղեկացնի Վրաստանի նախագահին և Վրաստանի խորհրդարանին սույն որոշման առաջին հոդվածում նշված համաձայնագրի կնքման մասին,

բ) ծանուցի Ադրբեջանի Հանրապետության կողմին սույն որոշման առաջին հոդվածում նշված համաձայնագրի ուժի մեջ մտնելու ակնկալիքով վրացական կողմից անհրաժեշտ ներպետական ընթացակարգերի ավարտի վերաբերյալ։

Որոշումն ուժի մեջ է մտնում հրապարակման պահից»,- նշված է կառավարության որոշման մեջ։

Այս որոշման, նաև Ադրբեջանի նախագահի հրամանագրի մեջ հստակ նշված չեն այն պայմաններն ու սակագները, որոնք ներառում է երկու երկրների միջև էլեկտրաէներգիայի մատակարարման և տարանցման պայմանագիրը։

Հիշյալ փաստաթուղթը ձևակերպվել է 2026 թվականի մայիսի 18-ին՝ Վրաստանի վարչապետ Իրակլի Կոբախիձեի գլխավորությամբ Ադրբեջան մեկնած կառավարական պատվիրակության այցի շրջանակներում։ Այդ ժամանակահատվածում կողմերը կնքել են 20-ամյա միջկառավարական էներգետիկ համաձայնագիր, որը կարգավորում է էլեկտրաէներգիայի մատակարարման և տարանցիկ փոխադրումների հիմնական պայմանները։

Վրաստանի էկոնոմիկայի և կայուն զարգացման նախարարության հաղորդմամբ՝ ստորագրված համաձայնագրերի փաթեթի համաձայն, Վրաստանն ու Ադրբեջանը 20-ամյա ժամանակահատվածով պայմանավորվել են էլեկտրաէներգիայի մատակարարման և տարանցիկ փոխադրումների հիմնական պայմանների շուրջ։ Փաստաթղթով նախատեսված պայմանները կգործեն 2027 թվականի հունվարի 1-ից։

Aliq.ge