Հունգարիայի խորհրդարանը քվեարկել է նախագահին պաշտոնանկ անելու օգտին՝ որպես Օրբանի դեմ ուղղված վերջին քայլ

Հունգարիայի խորհրդարանը սահմանադրական փոփոխություն է ընդունել, որով նախագահ Տամաշ Սուլյոկը հեռացվում է իր պաշտոնից։ Այս մասին հայտնում է Aljazeera-ն։

139 կողմ և 6 դեմ ձայներով ընդունված որոշումն անմիջապես դադարեցնում է Սուլյոկի լիազորությունները և ճանապարհ հարթում նոր նախագահի ընտրության համար։

Այս քայլը հաջորդում է ապրիլյան ընտրություններին, որոնց արդյունքում վարչապետ է դարձել Պետեր Մագյարը, իսկ նրա «Տիսա» կուսակցությունը վերջ է տվել Վիկտոր Օրբանի «Ֆիդես» կուսակցության 16-ամյա իշխանությանը։ Իշխանության գալուց հետո Մագյարը հայտարարել է նախկին իշխանության ազդեցությունը սահմանափակելու մտադրության մասին։

Ընդունված սահմանադրական փոփոխությունը նախատեսում է նաև դատական բարեփոխումներ, նախորդ կառավարության օրոք ենթադրյալ ֆինանսական չարաշահումները հետաքննող մարմնի ստեղծում և օրենսդիրների համար 12 տարվա պաշտոնավարման սահմանափակում։

Սուլյոկը հինգ օր ունի փոփոխությունը ստորագրելու համար։ Մագյարը հայտարարել է, որ եթե նախագահը հրաժարվի դա անել, խորհրդարանը կսկսի նրա իմպիչմենտի գործընթացը։ Ի պատասխան՝ Սուլյոկը և «Ֆիդես»-ի պատգամավորները բոյկոտել են խորհրդարանի նիստը։

Սուլյոկը նախագահի պաշտոնում ընտրվել էր 2024 թվականի փետրվարին՝ փոխարինելով Կատալին Նովակին, որը հրաժարական էր տվել աղմկահարույց ներման գործից հետո։ Սակայն Մագյարը բազմիցս հայտարարել է, որ Սուլյոկը չի կարող մարմնավորել ազգի միասնությունը՝ նրան անվանելով Օրբանի «խամաճիկ» և խոստանալով սահմանադրական ճանապարհով հեռացնել նախկին իշխանության նշանակած պաշտոնյաներին։

Թեև Հունգարիայի նախագահի պաշտոնը հիմնականում խորհրդանշական է, այն ներառում է օրենքների հաստատման և դրանք Սահմանադրական դատարան ուղարկելու լիազորություն։ Նոր իշխանությունները մտավախություն ունեն, որ Սուլյոկը կարող էր օգտագործել այդ լիազորությունները՝ «Տիսա» կուսակցության բարեփոխումների ծրագիրը խոչընդոտելու համար։