Արթիկի քաղաքապետարանում կրկին կոռուպցիոն սկանդալ․ ինչո՞ւ են նույն պատմությունները կրկնվում. Mnews.am

Երեկ «Հրապարակ»-ը տեղեկություն հրապարակեց, որ ենթադրյալ կաշառքի գործով ձերբակալվել է Արթիկի համայնքապետարանի գլխավոր ճարտարապետ Արկադի Գրիգորյանը։ Այսօր արդեն հայտնի դարձավ, որ դատարանը նրան կալանավորել է երկու ամսով։

 

Ստեղծված իրավիճակը լուրջ հարցեր է առաջացնում Արթիկի համայնքապետարանի աշխատանքի, վերահսկողության և պատասխանատվության համակարգի վերաբերյալ։

 

Եթե համայնքի գլխավոր ճարտարապետը հայտնվել է նման գործի կենտրոնում, ապա հասարակությունը իրավունք ունի ստանալու պարզաբանումներ։ Ո՞վ է վերահսկել քաղաքաշինության ոլորտում իրականացվող գործընթացները, ինչպե՞ս է իրականացվել վերահսկողությունը, և արդյո՞ք համայնքի ղեկավարությունը տեղեկացված է եղել տեղի ունեցող իրադարձությունների մասին։

 

Եթե համայնքի ղեկավարությունը տեղեկացված է եղել, ապա հարց է առաջանում՝ ինչո՞ւ հնարավոր խնդիրները չեն կանխվել։ Իսկ եթե տեղեկացված չի եղել, ապա դա ևս լուրջ կառավարման խնդիր է, քանի որ քաղաքաշինության ոլորտը համայնքի կարևորագույն ուղղություններից մեկն է։

 

Այս պահին Արթիկի համայնքապետարանի լռությունը լրացուցիչ հարցեր է առաջացնում։ Հանրությունը սպասում է ոչ թե լռության, այլ հստակ պատասխանների և պարզաբանումների։

 

Պետք է պարզ դառնա՝ ինչ է իրականում տեղի ունեցել, ինչ շրջանակների է վերաբերում քննությունը և արդյոք պատասխանատվության հարցը կքննարկվի բոլոր այն հանգամանքների դեպքում, որոնք կբացահայտվեն քննության ընթացքում։

 

Միևնույն ժամանակ, հարկ է հիշեցնել, որ Արկադի Գրիգորյանի և գործով ներգրավված ցանկացած այլ անձի մեղավորությունը կարող է հաստատվել միայն դատարանի օրինական ուժի մեջ մտած դատավճռով։

 

Հիշեցնենք՝ սա առաջին դեպքը չէ, երբ Արթիկի ու մարզային կառույցների աշխատակիցները հայտնվում են իրավապահների ուշադրության կենտրոնում։ Դեռ մեկ-երկու տարի առաջ էլ նման պատմություն եղավ, երբ կալանավորվեցին Արթիկի համայնքապետարանի և Շիրակի մարզպետարանի աշխատակիցներ։

 

Մարդիկ ուզում են հասկանալ՝ սա պատահական դեպքերի շարք է, թե՞ արդեն ձևավորված խնդիր, որի մասին պետք է ավելի լուրջ խոսել։

Սկզբնաղբյուրնկայք՝  Mnews.am