«Միջուկային գործարքը խնդրի միայն մի մասն է». Գերմանիան պահանջել է քննարկել Իրանի հրթիռներն ու դաշնակիցներին

Գերմանիայի արտգործնախարար Յոհան Վադեֆուլը Իսրայել կատարած այցի ընթացքում տեղի ունեցած մամուլի ասուլիսում հայտարարել է, որ Բեռլինը մանրակրկիտ կերպով ուսումնասիրելու է Իրանի դեմ պատժամիջոցների մեղմացմանն ուղղված ցանկացած քայլ, հաղորդում է The Times of Israel-ը։

Ըստ նրա՝ անհրաժեշտ է թույլ չտալ, որ Թեհրանը միջուկային զենք ստանա, ինչպես նաև ԱՄՆ-ի և Իրանի միջև բանակցություններում ներառել իրանական բալիստիկ հրթիռների ծրագրի և տարածաշրջանային զինված խմբավորումներին աջակցելու հարցերը։

«Կարծում եմ՝  Իսրայելի և Գերմանիայի միջև այդ բանակցությունների ընթացքում առկա է բավականին միասնական դիրքորոշում»,- գերմաներենով հայտարարել է Վադեֆուլը Իսրայելի արտգործնախարար Գիդեոն Սաարի հետ համատեղ մամուլի ասուլիսում՝ պատասխանելով ԱՄՆ-ի և Իրանի միջև փոխըմբռնման հուշագրի վերաբերյալ Բեռլինի դիրքորոշման մասին The Times of Israel-ի հարցին։

Վադեֆուլն ընդգծել է, որ Իրանը ոչ մի դեպքում չպետք է տիրապետի միջուկային զենքի՝ մատնանշելով անցյալ տարի snapback (պատժամիջոցների անհապաղ վերականգնման) մեխանիզմը վերագործարկելու Եվրոպայի որոշումը և Թեհրանի դեմ նոր պատժամիջոցների սահմանումը։

«Ինչ-որ պահի մենք՝ եվրոպացիներս, պետք է մասնակցենք [ԱՄՆ-ի և Իրանի միջև] բանակցություններին, և մենք շատ ուշադիր հետևելու ենք, որ պատժամիջոցները մեղմացվեն միայն այն ժամանակ, երբ մեզ համար իրոք հստակ դառնա, որ ստեղծվել են երաշխիքներ, որոնք կանխում են Իրանի կողմից միջուկային զենքի ստացումը»,- ասել է նա։

Գերմանիայի ԱԳՆ ղեկավարը նշել է, որ «Իրանի աջակցությունը տարածաշրջանային զինված խմբավորումներին և բալիստիկ հրթիռների ստեղծման նրա ծրագիրը»՝ Իսրայելի համար առանցքային հարցերը, որոնք չէին շոշափվել փոխընդռնման հուշագրում, նույնպես պետք է ԱՄՆ-Իրան բանակցությունների մաս դառնան։

Ըստ նրա՝ ինքն այդ հարցը քննարկել է ԱՄՆ պետքարտուղար Մարկո Ռուբիոյի հետ անցյալ շաբաթ անցկացված հանդիպման ժամանակ։

«Մենք միշտ հստակ հասկացրել ենք, որ Իրանի վարքագիծն իր տարածաշրջանում պետք է հաշվի առնվի՝ նրա աջակցությունը տարբեր ահաբեկչական կազմակերպություններին. ոչ միայն «Հըզբոլլահին», ոչ միայն ՀԱՄԱՍ-ին, այլև հուսիթներին։ Հուսիթները սպառնում են ոչ միայն Իսրայելին, այլև միջազգային ծովային ու առևտրային երթուղիներին, որոնք Գերմանիան օգտագործում է Եվրոպայի համար։ Դա պետք է հաշվի առնվի, և, բնականաբար, անհրաժեշտ է նաև հաշվի առնել Իրանի բալիստիկ հրթիռների ծրագիրը, որը կարող է սպառնալիք ներկայացնել նաև Եվրոպայի համար»,- հայտարարել է Վադեֆուլը։

Ըստ նրա՝ այդ հարցերը «պետք է ներառվեն բանակցություններում», սակայն նա հավելել է, որ «այս փուլում բանակցություններն, ըստ էության, դեռևս փաստացի չեն մեկնարկել»։