Շոգն առաջին անգամ կարող է տապալել «Տուր դը Ֆրանս»-ի փուլերը. կազմակերպիչները պատրաստվում են էքստրեմալ եղանակին

Շաբաթ օրը Բարսելոնայում մեկնարկող Tour de France բազմօրյա հեծանվավազքի կազմակերպիչները պատրաստվում են էքստրեմալ շոգի նոր ալիքի հնարավոր հետևանքներին, որն, ըստ կանխատեսումների, առաջիկա օրերին կպատի Ֆրանսիան և Իսպանիան։ Մրցավազքի պատմության մեջ առաջին անգամ դիտարկվում է բարձր ջերմաստիճանի պատճառով առանձին փուլեր չեղարկելու հավանականությունը, գրում է The Guardian-ը։

«Տուր դը Ֆրանս»-ի տեխնիկական տնօրեն Թիերի Գուվենուն հայտարարել է, որ կլիմայական պայմանները դառնում են կազմակերպիչների գլխավոր խնդիրներից մեկը։

«Մենք մշտապես մտածում ենք դրա մասին։ Նախկինում էլ ենք բախվել նման իրավիճակների, բայց հիմա ամեն ինչ շատ ավելի լուրջ է, հատկապես մայիսին և հունիսին տեղի ունեցածից հետո»,- նշել է նա։

Օդերևութաբանների կանխատեսումներով՝ Ֆրանսիայի և Իսպանիայի որոշ շրջաններում ջերմաստիճանը կարող է հասնել 44 աստիճանի։ Արդեն իսկ մրցավազքի երկրորդ փուլը, որն անցկացվելու է կիրակի օրը՝ Միջերկրական ծովի ափով անցնող Տարագոնա-Բարսելոնա երթուղով, կարող է հայտնվել անոմալ շոգի ազդեցության տակ։

Էքստրեմալ ջերմաստիճանն արդեն իսկ իր ազդեցությունն է թողել հեծանվային այլ մրցարշավների վրա։ «Շվեյցարիայի տուրի» ժամանակ ընդհանուր հաշվարկի առաջատար Էլիզա Լոնգո Բորգինին ջերմային հարված է ստացել, կորցրել է գրեթե տասը րոպե և վերջնագծից հետո ինքնազգացողության ու հիշողության լուրջ խնդիրներ է ունեցել։

XDS Astana թիմի բժշկական տնօրեն Էմիլիո Մանյին նախազգուշացրել է, որ ջերմային հարվածը լուրջ սպառնալիք է մարզիկների կյանքի համար։ Նա նշել է,որ գերտաքացման դեպքում սկսում են խաթարվել ուղեղի ջերմակարգավորման մեխանիզմները, իսկ այնուհետև տուժում են սիրտ-անոթային համակարգն ու արյան շրջանառությունը։

Էքստրեմալ եղանակային պայմաններում մրցումների անցկացման գործող արձանագրությունը նախատեսում է սննդի լրացուցիչ կետեր, ջրի քանակի ավելացում և սառը ըմպելիքներով մոտոցիկլետների կիրառում հեծանվորդների համար։ Սակայն կազմակերպիչներն ընդունում են, որ այս միջոցները կարող են անբավարար լինել նման բարձր ջերմաստիճանի պայմաններում։

Պրոֆեսիոնալ համայնքում հնչում են նաև առաջարկներ՝ փուլերի մեկնարկը տեղափոխել ավելի վաղ ժամերի, որպեսզի խուսափեն օրվա ամենաշոգ ժամերից։ Սակայն կազմակերպիչները նշում են, որ մրցավազքի ժամանակացույցը մեծապես պայմանավորված է միջազգային հեռուստատեսային հեռարձակումներով։

Մրցավազքի տնօրեն Քրիստիան Պրյուդոմն ընդգծել է, որ վերջին պահին մրցումների գրաֆիկը փոխելը չափազանց բարդ է, քանի որ «Տուր դը Ֆրանս»-ի անվտանգության և կազմակերպման համար պահանջվում է ոստիկանության, ժանդարմերիայի և արտակարգ ծառայությունների շուրջ 28 հազար աշխատակցի ներգրավում։

«Տուր դը Ֆրանս»-ի ամբողջ պատմության ընթացքում փուլերը չեղարկվել են պատերազմների, գործադուլների, հասարակական անկարգությունների և համավարակի պատճառով, սակայն ոչ մի անգամ չեղարկման պատճառ չի դարձել էքստրեմալ շոգը։ Այժմ կազմակերպիչները չեն բացառում, որ կլիմայի փոփոխությունը կարող է առաջին անգամ հանգեցնել նման սցենարի։