1.5 մլն դրամ աշխատավարձ, տունն ու հողամասն էլ` նվեր

«Հրապարակ»-ը գրում է.

ԿԸՀ նախագահ Վահագն Հովակիմյանը, ով 2022 թվականի հոկտեմբերից է այս պաշտոնը զբաղեցնում, և ում մասին հիշում են ընտրությունից՝ ընտրություն, պաշտոնը ստանձնելուց մեկ տարի չանցած՝ 2023թ. հունիսին Երևանի Աջափնյակ վարչական շրջանում առանձնատուն ու հողամաս է նվեր ստացել։ Հովակիմյանը նաև առանձնատուն է կառուցում, որի համար կառուցապատման վարկ է վերցրել։ 2025թ. վերջին նրա վարկի մնացորդը կազմել է 34 մլն 890 հազար 659 դրամ։

Վահագն Հովակիմյանը «Հովակիմյաններ Ն.Մ.» ընկերության 100 տոկոս բաժնետերն է։ Հովակիմյանը տարվա ընթացքում 1.4 մլն դրամով վաճառել է իր «NISSAN» մակնիշի ավտոմեքենան։ Տարեվերջին նրա բանկային հաշիվներին եղել է 1 մլն 424 հազար 797 դրամ և 6 հազար դոլար, իսկ կանխիկ ունեցել է 2 մլն դրամ։ Նրա եկամուտները կազմել են 21 մլն 483 հազար 900 դրամ, որից 18 մլն 349 հազար 314 դրամը գոյացել է աշխատավարձից, իսկ մնացած գումարը՝ եկամտահարկից։

Այսինքն, Վահագն Հովակիմյանն ամսական ստացել է մոտ 1.5 մլն դրամ աշխատավարձ։

Ի տարբերություն ամուսնու՝ Հովակիմյանի կինը՝ Լուսինե Մովսիսյանը, համեստ աշխատավարձ ու դրամական միջոցներ ունի։ Վերջինս բանկային հաշվին ունեցել է ընդամենը 45 հազար դրամ, բանկում՝ 120 հազար դրամ ավանդ, իսկ տարվա ընթացքում «Լուսինե Ռուբիկի Մովսիսյան» ԱՁ-ից ստացել է ընդամենը 100 հազար դրամ եկամուտ։