Լեհաստանում հարգված ուկրաինացի գեներալ Մարկո Բեզրուչկոն հնարավոր է ընդգրկվի Ուկրաինայի ազգային հիշողության պանթեոնում

Ուկրաինայում դիտարկվում է Ուկրաինայի Ժողովրդական Հանրապետության բանակի գեներալ Մարկո Բեզրուչկոյին ազգային հիշողության պանթեոնում ընդգրկելու հնարավորությունը։ Բեզրուչկոն 1920 թվականին լեհական զորքերի հետ համատեղ մասնակցել է Կիևի գրավմանը և Զամոստյեի պաշտպանությանը խորհրդային ուժերի հարձակումից, գրում է լեհական Wirtualna Polskaպարբերականը։

Ժամանակակից Լեհաստանում նրա անունով արդեն իսկ կոչվել են պուրակ Վարշավայի Վոլյա թաղամասում և շրջանաձև խաչմերուկ Վրոցլավում։

Լեհական աղբյուրների գնահատմամբ՝ նման նախաձեռնությունը կարող է դիտարկվել որպես Վարշավայի և Կիևի միջև պատմական հարցերում առկա լարվածությունը նվազեցնելու փորձ։

Միաժամանակ նշվում է, որ գործող օրենսդրությունը թույլ է տալիս ցուցակում ներառել տարբեր պատմական դեմքերի, ներառյալ՝ Կլիմ Սավուրին և Ռոման Շուխևիչին, որոնց Լեհաստանում համարում են լեհ բնակչության դեմ իրականացված հանցագործությունների մասնակից։

Ուկրաինայի Գերագույն Ռադան ընդունել է օրենք, որն իրավական հիմք է ստեղծում ականավոր գործիչների պանթեոնի ձևավորման համար։ Թեկնածուների ցուցակը փակ չէ և պետք է ներառի ուկրաինական պատմության ամենանշանակալի ներկայացուցիչներին։ Օրենքին կողմ է քվեարկել 450 պատգամավորից 287-ը։

Կոնկրետ անձանց ներառելու մասին որոշումն ընդունելու է խորհրդարանը՝ հատուկ խորհրդի հանձնարարականների հիման վրա, որի կազմում ընդգրկվելու են Ուկրաինայի ազգային հիշողության ինստիտուտի ներկայացուցիչներ, անկախ պատմաբաններ և հասարակական կազմակերպությունների ներկայացուցիչներ։

Գերագույն Ռադայի նախագահ Ռուսլան Ստեֆանչուկը հայտարարել է, որ օրենքը հիմք է ստեղծում ազգային հիշողության վայրի համար, որտեղ մեծարվելու են երկրի ամենանշանավոր անհատները։

Լեհաստանում նշում են, որ հստակ հաստատագրված ցանկի բացակայությունը տարբեր մեկնաբանությունների և հետագայում հնարավոր տարաձայնությունների տեղիք է տալիս։ Դիվանագիտական և փորձագիտական շրջանակներում նշվում է, որ նման քայլերը կարող են ընկալվել որպես լարվածության նվազեցման տարր, սակայն երկրների միջև պատմական երկխոսության կայուն բարելավում չեն երաշխավորում։

Ավելի վաղ ևս ձեռնարկվել են պատմական հակասությունները մեղմելու փորձեր, ներառյալ համատեղ հայտարարություններն ու խորհրդանշական ժեստերը 2023 թվականին Լեհաստանի նախագահ Անջեյ Դուդայի Լվով կատարած այցի ժամանակ։

Ընդսմին, մի շարք դիտորդների գնահատմամբ, այդ քայլերը չեն հանգեցրել պատմական տարաձայնությունների կարգավորման գործում երկարաժամկետ առաջընթացի։