Ադրբեջանին պատժելու համար` պետք է Քրեական միջազգային դատարան դիմելու ստատուտին միանալու քայլեր արվեն (տեսանյութ)

«Պետք է չշտապել, պետք է հավասարակշռված քայլեր կատարենք միջազգային դատարաններ դիմելու համար»: «Անդրադարձ» մամուլի ակումբում լրագրողների հետ զրույցում ասաց Հ ԱԺ պատգամավոր, Մարդու իրավունքների պաշտպանության և հանրային հարցերի մշտական հանձնաժողովի նախագահի տեղակալ Մարգարիտ Եսայանը` անդրադառնալով Ադրբեջանին պատասխանատվության ենթարկելու խնդրին:

«Այն, ինչ կատարվեց դա պատերազմ չէր, դա քաղաքակրթությունների կռիվ էր: Եթե հայկական կողմը պաշտպանվում էր հարձակումներից և դասական իմաստով պատերազմ էր վարում, ադրբեջանական կողմից զինվորներն ու հրամանատարները, նաև վարձկանները սահմանագծին իրականացնում էին ահաբեկչական դրսևորումներ և պատերազմին ոչ հարիր գործողություններ: Հարձակումները եղել են բնակավայրերի վրա, խաղաղ բնակիչների, նաև՝ զինվորականների նկատմամբ վայրագություններ են իրականացվել: Տեսանք, թե ինչպես էին անդամահատել խաղաղ բնակիչներին. հավաքագրում են համապատասխան մարմիները այդ բոլոր փաստերը, որպեսզի կարողանանք փաստարկված ներկայանալ միջազգային դատարան»,-ասաց նա:

ՀՀ փաստաբանների պալատի խորհրդի անդամ Նիկոլայ Բաղդասարյանն էլ նշեց, թե միջազգային իրավական հարթություններին դիմելու համար կատարվող գործողությունները քայլ առ քայլ պետք է ներկայացվեն հանրությանը և կարծիք հայտնեց, թե բոլոր կառույցներին դիմելու հնարավորություն Հայաստանը միանշանակ չունի:

«Միջազգային քրեական դատարանը քննում է այն պետությունների գործերը, որոնք միացել են ստատուտին, բայց ոչ ՀՀ-ն, ոչ էլ Ադրբեջանը չեն միացել. ուստի գործ հարուցելը տեխնիկական խնդիր է, և այստեղ դատախազը կարող է գործ հարուցել ՄԱԿ-ի անվտանգության որոշման վրա: Եթե միացած լինեինք, որևէ խոչընդոտ չկար, որ անմիջապես դատախազը գործ հարուցեր, իսկ այս դեպքում անդամ երկրները կարող են ուղղակի վետո դնել և թույլ չտալ գործը գնա միջազգային քրեական դատարան»,-ասաց նա:

Մանրամասները` տեսանյութում