Կազանի փաստաթուղթը, ըստ էութան, նույն Մադրիդյան փաստաթուղթն է

Միշտ համանախագահներն ասել են, որ ինչ-որ փուլում դա լինելու է, իսկ ինչ-որ փուլը ենթադրում էր Կազանը: Կառավարության նիստից հետո լրագրողների հետ զրույցում այս մասին ասաց Արտագին գործերի փոխնախարար Շավարշ Քոչարյանը` պատասխանելով լրագրողի հարցին, թե  հնարավոր է համարում արդյոք ԼՂՀ մասնակցությունը բանակցություններին:

«Համանախագահների պատկերացմամբ, երբ որ լինի արդեն բուն պայմանագրի մշակումը, պետք է ներգրավվի: Սակայն վերջին իրադարձությունները ցույց տվեցին, որ այնուամենայնիվ, դա սխալ է՝ ինչքան շուտ մասնակցի, այնքան լավ»,- ասաց նա:

Անդրադառնալով Կազանի փաստաթղթին՝ Քոչարյանն ասաց, որ դա ըստ էութան նույն Մադրիդյան փաստաթուղթն է՝ որոշակի փոփոխություններով: “Քանի որ փաստաթուղթը հրապարակված չէ, ես կարող եմ ասել, որ այնտեղ կան ավելի շատ դրական փոփոխություններ Հայաստանի ու Ղարաբաղի համար, եթե համեմատենք Մադրիդի հետ»,- ասաց նա՝ հավելելով, որ չի կարող մանրամասնել, քանի որ փաստաթուղթը հրապարակային չէ:

«Բայց մի բան կարող եմ արձանագրել, որ այն, ինչ հրապարակային տրված է համանախագահների հայտարարություններում, նույն տարրերն ու սկզբունքներն են”:
Անդրադառնալով ՌԴ նախագահ Վլադիմիր Պուտինի հայտարարությանը, թե ղարաբաղյան հիմնախնդրին պետք է վերաբերվել բժշկական սկզբունքով՝ մի վնասիր, և հարցին, թե արդյոք զենք վաճառելով Ադրբեջանին՝ այդ երկիրը չի՞ վնասում, նա ասաց. «Բնական է՝ մենք չենք ցանկանա, որ որևէ մեկը վնասի: Ես չեմ կարող դա մեկնաբանել»: