«Գազպրոմ Արմենիա» ՓԲԸ «Ուսումնա-սպորտային համալիր» հիմնարկի դպրոցը ընդգրկվել է աշխարհի լավագույն դպրոցների թոփ 10-ում

«Գազպրոմ Արմենիա» ՓԲԸ «Ուսումնա-սպորտային համալիր» հիմնարկը ճանաչվել է աշխարհի լավագույն դպրոցներից մեկը՝ ընդգրկվելով կրթության ոլորտի ամենահեղինակավոր միջազգային մրցանակաբաշխություններից մեկի՝ «World's Best School Prizes 2026»-ի («2026թ․ աշխարհի լավագույն դպրոցներ» մրցանակ)  «Supporting Healthy Lives» («Առողջ ապրելակերպի խթանում») անվանակարգի լավագույն տասնյակում։

«World's Best School Prizes» մրցանակաբաշխությունը, որը կազմակերպվում է բրիտանական «T4 Education» միջազգային կրթական ընկերության կողմից, համարվում է դպրոցական կրթության ոլորտի ամենահեղինակավոր միջազգային նախաձեռնություններից մեկը։ Այն միավորում է աշխարհի տարբեր երկրների կրթական հաստատությունները և նպատակ ունի բացահայտել ու արժևորել դպրոցներ, որոնք նորարարական մոտեցումներով, արդյունավետ կրթական լուծումներով և հասարակության վրա ունեցած դրական ազդեցությամբ ձևավորում են ժամանակակից կրթության լավագույն փորձը։

«Գազպրոմ Արմենիա» ՓԲԸ «Ուսումնա-սպորտային համալիր» հիմնարկը հիմնադրվել է 2019 թվականին՝ նպատակ ունենալով ձևավորել առողջ միջավայր, որտեղ կրթությունը, սպորտը և սովորողների համակողմանի զարգացումը կազմում են մեկ ամբողջական համակարգ։ Այսօր համալիրն իր շուրջ հազար սաների համար իրականացնում է որակյալ կրթության ապահովմանը, առողջ ապրելակերպի խթանման ու արժեքահեն կրթական միջավայրի ձևավորման ուղղված հեղինակային ծրագրեր, որոնք պայմանականորեն բաժանվում են երեք հիմնական ուղղությունների՝ մտավոր, ստեղծագործական և ֆիզիկական ակտիվության։

«Շնորհավորում ենք «Գազպրոմ Արմենիա» ՓԲԸ-ի «Ուսումնա-սպորտային համալիր» համալիրին հինգերորդ ամենամյա «World's Best School Prizes 2026»-ի («Աշխարհի լավագույն դպրոցների մրցանակներ» 2026 թ․) թոփ 10-ում ընդգրկվելու առթիվ։ Դուք ապացուցել եք, որ Հայաստանի դպրոցներն իսկապես աշխարհի լավագույնների շարքում են»,- նշել է «T4 Education» կազմակերպության հիմնադիր և մրցանակաբաշխության նախաձեռնող Վիկաս Պոտան։

«Սա մեր ամբողջ թիմի՝ մանկավարժների, սովորողների, ծնողների և գործընկերների համատեղ աշխատանքի միջազգային ճանաչումն է։ Մեզ համար այս գնահատականը ոչ միայն մեծ պատիվ է, այլև պատասխանատվություն՝ շարունակելու ստեղծել այնպիսի կրթական միջավայր, որտեղ յուրաքանչյուր երեխայի առողջությունը, բարեկեցությունը և համակողմանի զարգացումը առաջնային արժեքներ են»,- նշել է համալիրի տնօրեն Ալեքսանդր Գրիգորյանը և հավելել,- «Այս հավաստագիրը վկայում է, որ մեր համալիրի գործունեությունը, արժեքները և կրթական մոտեցումները գնահատվել են միջազգային մասնագիտական հանրության կողմից և դասվել աշխարհի լավագույն փորձերի շարքում։ Սա բարձրագույն գնահատականն է այն աշխատանքին, որը մենք տարիներ շարունակ կատարել ենք հավատով, նվիրումով և մեծ պատասխանատվությամբ»։