Գազայում իսրայելական հարվածների հետևանքով զոհվել է «Ալ Ջազիրա»-ի օպերատորը

Գազայի հատվածում Իսրայելի կողմից իրականացված նոր հարվածների հետևանքով զոհվել է առնվազն վեց մարդ, այդ թվում՝ «Ալ Ջազիրա»-ի օպերատոր Ահմեդ Վիշահը և առնվազն մեկ երեխա։ Այս մասին հայտնում է BBC-ն՝  հղում անելով  առողջապահության պաշտոնյաներին ու փրկարար ծառայություններին։

«Ալ Ջազիրա»-ն հայտարարել է, որ խստորեն դատապարտում է իր թղթակից Ահմեդ Վիշահի թիրախավորման և սպանության սարսափելի հանցագործությունը։ Ըստ հեռուստաընկերության՝ Վիշահը սպանվել է շաբաթ օրը Գազայի կենտրոնական հատվածում գտնվող տան վրա հասցված հարվածի հետևանքով։

Իսրայելի պաշտպանության բանակը (IDF) հայտարարել է, որ Վիշահը «Համասի ռազմական թևի ահաբեկիչ էր, որը ծառայել է որպես դիպուկահար»։ Իսրայելական կողմը նաև պնդում է, որ վերջին ամիսներին նա մասնակցել է իսրայելական զորքերի դեմ դիպուկահար հարձակման նախապատրաստմանը, սակայն որևէ ապացույց չի ներկայացրել։

Տեղի հիվանդանոցի և «Համաս»-ի կողմից ղեկավարվող քաղաքացիական պաշտպանության ծառայության տվյալներով՝ Բուրեյջի փախստականների ճամբարում գտնվող տան վրա հասցված նույն հարվածի հետևանքով Վիշահի հետ միասին զոհվել է ևս երկու մարդ։ Իսրայելի պաշտպանության բանակը նրանց ևս մեղադրել է «Համաս»-ի անդամ լինելու մեջ։

Ահմեդ Վիշահի եղբայրը՝ Մոհամեդ Վիշահը, որը նույնպես աշխատում էր «Ալ Ջազիրա»-ում, զոհվել էր ապրիլին իսրայելական հարվածի հետևանքով։ Այդ ժամանակ Իսրայելը նրան մեղադրել էր «Համաս»-ի հրթիռային և զենքի արտադրության շտաբում աշխատելու մեջ՝ առանց լրացուցիչ մանրամասներ ներկայացնելու։

Միևնույն ժամանակ, Գազա քաղաքի Սաբրա թաղամասում գիշերը բնակելի տան վրա հասցված հարվածի հետևանքով զոհվել է նույն ընտանիքի չորս անդամ։ Քաղաքացիական պաշտպանության ծառայության, հարազատների և Շիֆա հիվանդանոցի տվյալներով՝ զոհերի թվում եղել են երկու կին և առնվազն մեկ երեխա։ Հիվանդանոցը լրատվամիջոցներին հայտնել է, որ ստացել է ընտանիքի անդամների  մարմինները։

Հարվածներ են գրանցվել նաև Գազայի հարավային և հյուսիսային հատվածներում։ Իսրայելը և պաղեստինյան «Համաս» շարժումը շարունակաբար միմյանց մեղադրում են անցյալ տարվա հոկտեմբերից ուժի մեջ մտած հրադադարի պայմանները խախտելու մեջ։

Գազայում «Համաս»-ի կողմից ղեկավարվող առողջապահության նախարարության տվյալներով, որոնք ՄԱԿ-ը համարում է հուսալի, հրադադարի հաստատումից ի վեր իսրայելական գործողությունների հետևանքով զոհվել է 1007 մարդ։

Հրադադարի համաձայնագիրը նախատեսում էր նաև մարդասիրական օգնության ծավալների մեծացում։ ՄԱԿ-ի տվյալներով՝ Գազայի շենքերի շուրջ 81 տոկոսը վնասվել է պատերազմի ընթացքում, իսկ օգնության կազմակերպությունները շարունակում են հայտարարել, որ առկա աջակցությունը բավարար չէ։

Հրադադարի համաձայնագիրը նաև պահանջում էր, որ Համասը զինաթափվի և չմասնակցի Գազայի կառավարմանը, սակայն այդ դրույթները դեռևս չեն իրականացվել։ Միաժամանակ ստեղծվել է միջազգային դիվանագետներից կազմված «Խաղաղության խորհուրդ», որը պետք է վերահսկի ապաքաղաքական պաղեստինյան տեխնոկրատական կառույցի աշխատանքը Գազայի կառավարման հարցում։

Համաձայնագրում նշվում էր նաև, որ Իսրայելը չի օկուպացնի Գազան և աստիճանաբար կհանձնի պատերազմի ընթացքում գրավված տարածքները։ Սակայն մայիսին Իսրայելի վարչապետ Բենիամին Նեթանյահուն հայտարարել էր, որ հանձնարարել է Իսրայելի պաշտպանության բանակին իր վերահսկողության տակ գտնվող Գազայի տարածքը հասցնել հատվածի 70 տոկոսին։

Նշենք, որ վերջին լայնածավալ հակամարտությունը սկսվել է 2023 թվականի հոկտեմբերի 7-ին, երբ «Համաս»-ի գլխավորած զինյալները հարձակվել են Իսրայելի հարավային շրջանների վրա՝ սպանելով շուրջ 1200 մարդու և պատանդ վերցնելով 251 մարդու։ Գազայի առողջապահության նախարարության տվյալներով՝ այդ ժամանակից ի վեր Իսրայելի ռազմական գործողությունների հետևանքով զոհվել է ավելի քան 73 հազար մարդ։