«Ցանկություն ունեմ ավարտել բարձր նոտայով». Հենրիխ Մխիթարյանը խոսել է դժվարությունների մասին

Հայաստանի ազգային հավաքականի նախկին ավագ, Միլանի «Ինտերի» կիսապաշտպան Հենրիխ Մխիթարյանը «Փյունիկի» մամուլի ծառայությանը տված հարցազրույցում նշել է, որ ուզում է, որ երիտասարդները տեսնեն այն դժվարությունները, որոնց միջով անցել է։

«Ոչ թե տեսնեն միայն հաջողությունները, այլ նաև դժվարությունները, որովհետև դժվարությունների շնորհիվ է, որ դու կարող ես հասնել հաջողությունների։ Եվ հետո արդեն, նրանց հետ հանդիպելով ու խոսելով, կասեմ, որ երբեք ճանապարհը հեշտ չի լինում. ճանապարհը դժվար է, և հաջողության հասնելու համար պետք է պայքարել, աշխատել, հավատալ ինքդ քեզ, որ կարողանաս հաջողությունների հասնել»,- նշել է նա։

Անդրադառնալով նրան, թե ովքեր կարող են հասնել հաջողության, նա ասել է․

«Լինում են երկու տեսակի երիտասարդներ՝ նրանք, ովքեր երազում են, և նրանք, ովքեր ցանկություն ունեն հասնելու այդ երազանքներին, որովհետև այն մարդիկ, այն ֆուտբոլիստները, ովքեր երազում են և ոչինչ չեն անում, երբեք հաջողության չեն հասնում։ Բայց այն երիտասարդները, որոնք քրտնաջան, ամեն օր աշխատում են, հավատում են իրենց, դժվարություններից չեն բողոքում, նրանք միշտ էլ կհասնեն հաջողության»։

Նրա խոսքով՝ իր մոտիվացիայի աղբյուրը այն երիտասարդներն են, ովքեր մինչ այսօր հետևում են իրեն, տղան, հայրը և ընտանիքը։

«Ինչո՞ւ եմ սա ասում, որովհետև ես ինձ թույլ չեմ կարող տալ կանգնել ճանապարհի կեսին, չավարտել այն, ինչ սկսել եմ։ Ցանկություն ունեմ ավարտել բարձր նոտայով և հույս ունեմ, որ դեռ մեկ տարի էլ կխաղամ, որից հետո արդեն պարզ կերևա»։

Հիշեցնենք, որ Մխիթարյանը հունիսի 19-ին հատուկ կազմակերպված փակ միջոցառման շրջանակում հյուրընկալվել էր «Փյունիկի» ակադեմիայում, որտեղ հանդիպում-զրույց էր ունեցել պատանի սաների հետ։

Միջոցառման ընթացքում ներկաները մեկ րոպե լռությամբ հարգել էին հայկական ֆուտբոլի նշանավոր ներկայացուցիչ, Հենրիխի հոր՝ Համլետ Մխիթարյանի հիշատակը։ Ակումբի համար արդեն խորհրդանիշ դարձած «Փառքի ծառի» մոտ հայ ֆուտբոլիստը թողել էր իր ձեռքի և ոտքի հետքերը։