Բրազիլիայում հաքերները կոտրել են արտակարգ իրազեկումների համակարգը և բնակիչներին ուղարկել առեղծվածային հաղորդագրություն

Բրազիլիայի մի քանի նահանգներում շաբաթ առավոտյան բջջային հեռախոսներին ուղարկվել են չարտոնված արտակարգ ծանուցումներ, որոնք, ըստ իշխանությունների, հավանաբար դարձել են հաքերային հարձակման հետևանք, հաղորդել է CNN հեռուստաալիքը։

Օգտատերերի սարքերում հայտնվել է «misantropi4» առեղծվածային բառով հաղորդագրություն՝ misantropia («միզանտրոպիա») բառի աղավաղված տարբերակը, որտեղ «a» տառը փոխարինվել է 4 թվով, ինչը բնորոշ է այսպես կոչված «leet» լեզվին, որը հաճախ օգտագործում են հաքերները։

Սկզբում «ծայրահեղ» մակարդակի ահազանգի ազդանշանը գրանցվել էր Պարանա նահանգում, իսկ մի քանի րոպե անց նման ծանուցումներ ստացել են խոշորագույն քաղաքների՝ Սան Պաուլուի և Ռիո դե Ժանեյրոյի բնակիչները։

Բրազիլիայի քաղաքացիական պաշտպանության ազգային ծառայությունը հայտարարել է, որ իրազեկման համակարգը շարքից դուրս է եկել ենթադրյալ կիբեռհարձակումից հետո և ժամանակավորապես անջատվել է՝ անվտանգությունը վերականգնելու համար։

«Ուղարկված հաղորդագրությունը դասակարգվել է որպես «ծայրահեղ նախազգուշացում» և պարունակել է «միզանտրոպիա» բառը, որը նշանակում է ատելություն մարդկության հանդեպ։ Հավանաբար, սա հաքերային հարձակում է», — նշվել է գերատեսչության հայտարարության մեջ։

Իշխանությունները նշել են, որ քաղաքացիական պաշտպանության ոչ մի տարածաշրջանային մարմին չի նախաձեռնել հաղորդագրությունների տարածումը, իսկ իրական արտակարգ իրավիճակներ, որոնք կպահանջեին շտապ իրազեկում, չեն արձանագրվել։

Սան Պաուլուի և Ռիո դե Ժանեյրոյի տարածաշրջանային ծառայությունները նույնպես հաստատել են, որ նախազգուշացումները պաշտոնական չեն եղել։ Սան Պաուլուում նշել են, որ զանգվածային իրազեկումների համար օգտագործվող Cell Broadcast համակարգը ժամանակավորապես անջատված է, միջադեպը հետաքննվում է կապի ազգային կարգավորող Anatel-ի հետ համատեղ։

Որոշ օգտատերեր նաև հայտնել են SMS-ով նմանատիպ հաղորդագրություններ ստանալու մասին, ինչն ուժեղացրել է կասկածները լայնածավալ խափանման կամ իրազեկման ենթակառուցվածքի վրա նպատակային հարձակման վերաբերյալ։

Իշխանությունները շարունակում են հետաքննել հաղորդագրության ծագումը և վերականգնել արտակարգ ծանուցումների համակարգի աշխատանքը։