ԲՀԿ-ն պահանջում է ամբողջությամբ արդյունքների անվավեր ճանաչում ու վերաքվեարկության նշանակում. Փաստաբան

«Սա Հայաստանում առաջին դեպքն է, երբ ՍԴ-ում խախտումների ազդեցությունը ելքի վրա մաթեմատիկորեն ապացուցված է»,-ՍԴ դիմաց  լրագրողների հետ զրույցում ասաց փաստաբան Արամ Օրբելյանը՝ խոսելով ԲՀԿ կողմից ՍԴ ներկայացվող դիմումի մասին։

Նա նշեց, որ մինչ այս եղել են քննարկումներ, արդյոք խախտումներն ազդե՞լ են արդյունքների վրա, թե՞ ոչ։

«Հիմա ունենք դեպք, երբ վերահաշվարկի արդյունքում «Բարգավաճ Հայաստան» կուսակցությունը հավաքում է 4 տոկոսից ավելի ձայն, հետո մեկ էլ հանկարծակի երկու ընտրատեղամասում քվեարկության արդյունքները չեղյալ են համարվում ու պակասում է 153 ձայն։ Սա առաջին դեպքն է, նման բան չի եղել»,-ասաց Ա. Օրբելյանը՝ հիշեցնելով, որ խորհրդարանական ընտրություններում խորհրդարան անցնելու համար քաղաքական ուժը պետք է ստանա ընտրողների 4 տոկոսի ձայները։

Ո՞րն է ՍԴ-ից ակնկալիքը։ Արամ Օրբելյանն ընդգծեց՝ պետք  բոլորի համար հստակ լինի, որ ԲՀԿ-ն ստացել է 4 տոկոսից ավելի ձայն, ազդեցությունն ինքնին ապացուցված է։

«Պահանջել ենք անվավեր ճանաչել արդյունքները։ Անվավեր ճանաչելու դեպքում ՍԴ-ն երեք հնարավոր որոշում կարող է կայացնել։ Մենք պահանջել ենք ամբողջությամբ անվավեր ճանաչում ու վերաքվեարկություն, քանի որ խախտումները եղել են շատ, բազմաթիվ, վարչական ռեսուրսի օգտագործումը եղել է մասյական, միջազգային միջամտությունը եղել է ՔՊ-ի օգտին»,-խախտումները թվարկեց փաստաբանը։

Նա ընդգծեց նաև ընդդիմադիրների նկատմամբ ճնշումները, կալանքները, հետապնդումները։

«Մենք պահանջել ենք վերաքվեարկություն օրենքով սահմանված ընթացակարգերով, բայց որպես այլընտրանք, ինչպես նշեցի, ԲՀԿ-ն ունի այդ 4 տոկոսը, առնվազն մանդատների բաշխման այլ կարգ, որով ԲՀԿ-ն կանցնի խորհրդարան»,-ասաց Ա. Օրբելյանը։