ԱՄՆ-ում դատարանը երեք ցմահ ազատազրկման է դատապարտել 8 կնոջ սպանած սերիական մարդասպանին

«Գիլգո Բիչի սերիական մարդասպան» անունով հայտնի տխրահռչակ Ռեքս Հոյերմանը խոստովանել է ութ կանանց դաժան սպանությունները և չորեքշաբթի դատապարտվել է առավելագույն պատժաչափի, հաղորդում է BBC News-ը։

Դատարանը նրան երեք ցմահ ազատազրկում է նշանակել առաջին աստիճանի սպանությունների համար, ինչպես նաև 25 տարուց մինչև ցմահ ազատազրկում՝ երկրորդ աստիճանի սպանության չորս մեղադրանքներով։ Բոլոր պատժաչափերը կրվելու են հաջորդաբար։

Լոնգ Այլենդի Ռիվերհեդի դատարանում անցկացված լսումների ժամանակ հնչել են զոհերի հարազատների հուզական հայտարարությունները, որոնք սպանությունների հետևանքները նկարագրել են որպես «ցմահ տրավմա և կործանված կյանքեր»։

Դատավոր Թիմոթի Մացցեին խստորեն դատապարտել է ամբաստանյալին՝ նրան անվանելով «գարշելի ու ստոր մարդ» և «վախկոտ», որից հետո հայտարարել է առավելագույն դատավճիռը։

Սպանությունները տեղի են ունեցել 1993-2010 թվականների ընթացքում։ Գործը ավելի քան տասը տարի մնում էր չբացահայտված։

Ավելի ուշ նա խոստովանել է ութ կանանց՝ Մելիսա Բարտելեմիի (24 տարեկան), Մեգան Ուոթերմանի (22 տարեկան), Էմբեր Քոսթելոյի (27 տարեկան), Մորին Բրեյնարդ-Բարնսի (25 տարեկան), Ջեսիկա Թեյլորի (20 տարեկան), Վալերի Մաքի (24 տարեկան), Սանդրա Կոստիլայի (28 տարեկան) և Քարեն Վերգատայի (34 տարեկան) սպանությունները:

Զոհերի հարազատներն իրենց ելույթներում նկարագրել են բազմամյա տառապանքներն ու արդարադատության սպասումը։

Մելիսա Բարտելեմիի քույրը հայտարարել է, որ Հոյերմանը սպանությունից հետո զանգահարել է ընտանիքին և հեգնանքով հայտնել հանցագործության մանրամասները, ներառյալ տեղեկություններ զոհի մարմնի վիճակի մասին։

Մյուս զոհերի հարազատները նույնպես հանդես են եկել խիստ հայտարարություններով՝ մեղադրյալին անվանելով դաժան և անմարդկային։

Քննության տվյալներով՝ Հոյերմանը ձերբակալվել է 2023 թվականին Նյու Յորքի արվարձանում։ Ոստիկաններին հաջողվել է նրան կապել հանցագործությունների հետ ԴՆԹ-ի միջոցով, որը ստացվել էր պիցցայի տուփից։

Դատարանի տվյալներով՝ զոհեր են դարձել սեքս-ծառայությունների ոլորտում աշխատող կանայք, որոնց հետ նա կապ է հաստատել առցանց հայտարարությունների միջոցով։

Հետաքննությունը տևել է ավելի քան տասը տարի և ակտիվացել է 2022 թվականին հատուկ օպերատիվ խմբի ստեղծումից հետո, որը կարողացել է մի քանի շաբաթվա ընթացքում պարզել կասկածյալի ինքնությունը։