Al Arabiya-ն հրապարակել է ԱՄՆ-Իրան 14 կետանոց համաձայնագրի պատճենը

«Ալ Արաբիա» լրատվական ցանցը պնդում է, որ ձեռք է բերել ԱՄՆ-ի և Իրանի միջև կնքված 14 կետանոց համաձայնագրի պատճենը, որը, ենթադրաբար, ներկայացնում է փոխըմբռնման հուշագրի դրույթները։

Մասնավորապես, առաջին կետում նշվում է, որ երկրները պարտավորվում են անհապաղ և ընդմիշտ դադարեցնել պատերազմը բոլոր ճակատներում, այդ թվում՝ Լիբանանում:

Իրանը և Միացյալ Նահանգները պարտավորվում են հարգել միմյանց ինքնիշխանությունն ու տարածքային ամբողջականությունը և չմիջամտել միմյանց ներքին գործերին։

-  Երկու կողմերն էլ պարտավորվում են բանակցություններ վարել առավելագույնը 60 օր (փոխադարձ համաձայնությամբ երկարաձգման հնարավորությամբ)՝ վերջնական համաձայնության հասնելու համար։

- Այս փոխըմբռնման հուշագրի ստորագրումից անմիջապես հետո Միացյալ Նահանգները կվերացնի ծովային շրջափակումը և կդադարեցնի նավագնացության ցանկացած միջամտություն կամ խոչընդոտ, և առավելագույնը 30 օրվա ընթացքում լիովին կվերականգնի ծովային երթևեկությունը. նավագնացության ծավալները պետք է համապատասխանեն պատերազմից առաջ եղած մակարդակին։

- Միացյալ Նահանգները նաև պարտավորվում է վերջնական համաձայնագրի կնքումից հետո 30 օրվա ընթացքում դուրս բերել իր ուժերը հարակից տարածքներից։

- Իրանը նաև կձեռնարկի անհրաժեշտ միջոցներ փաստաթղթի ստորագրումից անմիջապես հետո՝ Պարսից ծոցում և Օմանի ծովում առևտրային նավագնացությունը վերսկսելու և այն պատերազմից առաջ եղած մակարդակին 30 օրվա ընթացքում վերադարձնելու համար՝ տեխնիկական խոչընդոտների վերացման և ականազերծման պայմանով։

- Միացյալ Նահանգները, իր տարածաշրջանային գործընկերների հետ միասին, կմշակի Իրանի տնտեսության վերականգնման և զարգացման համապարփակ ծրագիր, որի համար երաշխավորված կլինի առնվազն 300 միլիարդ դոլարի ֆինանսավորում։

- Այս ծրագրի իրականացման մեխանիզմը կմշակվի վերջնական համաձայնագրի հետ միաժամանակ՝ 60 օրվա ընթացքում։

- Միացյալ Նահանգները պարտավորվում է վերացնել Իրանի դեմ գործող բոլոր պատժամիջոցները, ներառյալ ՄԱԿ-ի Անվտանգության խորհրդի և Միջազգային ատոմային էներգիայի գործակալության կառավարիչների խորհրդի բանաձևերը, ինչպես նաև բոլոր միակողմանի պատժամիջոցները (առաջնային և երկրորդային)՝ համաձայնեցված ժամանակացույցի։

- Իրանը ընդգծում է, որ երբեք չի ձգտի մշակել միջուկային զենք։

- Կողմերը համաձայն են, որ հարստացված նյութի կարգավիճակը և այլ համաձայնեցված միջուկային հարցերը լիովին կլուծվեն վերջնական համաձայնագրում։

- Մինչև վերջնական համաձայնագրի հասնելը, ստատուս քվոն կպահպանվի. Իրանը կպահպանի իր միջուկային ծրագիրը ներկայիս վիճակում, և Միացյալ Նահանգները չի կիրառի նոր պատժամիջոցներ կամ չի ամրապնդի իր ռազմական ներկայությունը տարածաշրջանում։

- Միացյալ Նահանգները պարտավորվում է փաստաթղթի ստորագրումից անմիջապես հետո տրամադրել իրանական հում նավթի, նավթաքիմիական արտադրանքի և դրանց հետ կապված ծառայությունների (բանկային, ապահովագրական, տրանսպորտային և այլն) արտահանման համար անհրաժեշտ լիցենզիաները։

- Միացյալ Նահանգները նաև պարտավորվում է բանակցությունների ընթացքում ապասառեցնել և լիովին հասանելի դարձնել իրանական բոլոր սառեցված ակտիվներն ու գույքը։ Այս ֆինանսական միջոցները կտրամադրվեն Իրանի կենտրոնական բանկին և հասանելի կլինեն ցանկացած նախատեսված վճարումների համար, և Միացյալ Նահանգները կտրամադրի անհրաժեշտ լիցենզիաները։

- Կողմերը համաձայնվում են ստեղծել մեխանիզմ՝ համաձայնագրի կատարման և ապագա պարտավորությունների մոնիթորինգի համար։

- Այս փոխըմբռնման հուշագրի ստորագրումից և առանձին դրույթների կատարման երաշխիքների ստացումից հետո կշարունակվեն վերջնական համաձայնագրի շուրջ բանակցությունները։

- Վերջնական համաձայնագիրը պետք է հաստատվի ՄԱԿ-ի Անվտանգության խորհրդի պարտադիր բանաձևով։