ՔՊ-ականներն իրենց իրավական բեսպրեդելով ՀՀ-ում հաստատում են ավտորիտար, միակուսակցական համակարգ. Սուրեն Սուրենյանց

Քաղաքագետ, «Դեմոկրատական այլընտրանք» կուսակցության նախագահ, խորհրդարանական ընտրություններում ԲՀԿ ցուցակում ընդգրկված Սուրեն Սուրենյանցը գրում է.

«Երկրում իրավիճակի հետագա ցանկացած էսկալացիայի ողջ պատասխանատվությունն ամբողջությամբ ընկնում է Նիկոլ Փաշինյանի և նրա վարչախմբի վրա։ Այս մասին հայտարարել են վեց կուսակցությունները՝ հունիսի 7-ին կայացած խորհրդարանական ընտրությունների արդյունքների և երկրում ստեղծված քաղաքական իրավիճակի վերաբերյալ։ Այդ վեց կուսակցություններն են՝«Ուժեղ Հայաստան» կուսակցությունների դաշինքը, «Հայաստան» կուսակցությունների դաշինքը, «Բարգավաճ Հայաստան» կուսակցությունը, «Լուսավոր Հայաստան» կուսակցությունը, «Հայ ազգային կոնգրես» կուսակցությունը, «Ազգային ժողովրդական բևեռ» կուսակցությունը։

Ընդդիմությունը արձանագրում է՝Փաշինյանի ու ՔՊ-ի իշխանությունը լեգիտիմ չեն՝դրանից բխող բոլոր հետևանքներով։ Ընդդիմությունը դե-ֆակտո փորձում է ձևավորել մեկ միասնական բևեռ՝հակափաշինյանական կոալիացիա և ապալեգիտիմացնել այս կեղծված ընտրությունները։ Փաշինյանն ու ՔՊ-ն արդեն տոնում են հաղթանակը՝նրանք թույլ չտվեցին,որ ԲՀԿ մտնի խորհրդարան՝դրանով նրանք ցանկանում են ԱԺ-ով անցկացնել ցանկացած հակապետական, հակահայկական ու ադրբեջանամետ օրենք։

Վեց կուսակցությունները նշում են, որ ընտրությունների վերաբերյալ ներկայացված պաշտոնական տվյալները չեն արտացոլում ժողովրդի իրական կամքը և ընտրությունների ստույգ արդյունքները։ Այսինքն, Փաշինյանն ու թիմը նկարել են ընտրությունների արդյունքները, որպեսզի կարողանան մնալ իշխանության և կյանքի կոչել Արևմուտքի բոլոր պահանջները՝ԹՐԻՓՓ-ն ու հայ-ռուսական կապերի խզումը, ինչպես նաև թուրք-ադրբեջանական տանդեմի պահանջները՝Հայոց ցեղասպանության ուրացում՝հայ-թուրքական սահմանի բացման համար, ինչպես նաև Արցախի հարցի փակում և անկլավների հանձնում։

Փաշինյանն ու ՔՊ-ն կեղծելով ընտրությունները՝ԵՄ-ն ու ԱՄՆ-ն լռում են և ընդունում են կեղծված ընտրությունների արդյունքները, Հայաստանը վերածում են թուրք-ադրբեջանական տանդեմի տնտեսական, ռազմա-քաղաքական, էներգետիկ-տրանսպորտային, իսկ ապագայում նաև դեմոգրաֆիկ կցորդի՝ Իլհամ Ալիևը պահանջում է հարյուր հազարավոր ադրբեջանցիների վերադարձ Հայաստան։

ՔՊ-ականներն իրենց իրավական բեսպրեդելով ՀՀ-ում հաստատում են ավտորիտար, միակուսակցական համակարգ՝ընդդիմությունը կամ վերցնում է մանդատներն ու լեգիտիմացնում է ադրբեջանամետ այս իշխանությունը՝կամ փողոցային պայքարով հասնում է նոր ընտրությունների անցկացմանը կամ գոնե վերահաշվարկին, ինչի արդյունքում ԲՀԿ-ն կմտնի խորհրդարան։

Վեց կուսակցություններն իրենց հայտարարության մեջ նշել են, որ մենք շարունակելու ենք գործել բացառապես Սահմանադրության, օրենքների և ժողովրդավարական սկզբունքների շրջանակներում՝ պաշտպանելով քաղաքացիների ազատ կամարտահայտության իրավունքը և Հայաստանի Հանրապետության պետականության ու ժողովրդավարության հիմնարար արժեքները։

Այսինքն, ընդդիմությունը չի ցանկանում փաշինյանական կլանին տալ հնարավորություն ընդդիմությանը մեղադրել սահմանադրական կարգի տապալման կամ հեղաշրջման փորձերի մեջ՝դրանով մնալով ազատության մեջ և պայքարելով։ Փաշինյանն ու թիմն ամեն ինչ անելու են, որպեսզի ընդդիմության լիդերները ձերբակալվեն ու ընդդիմությունը քաղաքական իմաստով կոտրված ողնաշարով մտնի ԱԺ ու դառնա ՔՊ-ականների հարձակման ավելի հեշտ թիրախ»։