10 տարվա նախագահը 136 տարվա կուսակցության հետ 10 տոկոս ձայն չի հավաքել, ուրիշների աչքում փուշ է ման գալիս

Երեկ Ռոբերտ Քոչարյանի նախընտրական ցուցակում գտնվողներից մեկին պատկանող կայքում մի հոդված է հրապարակվել, որում նշվում էր, թե ՀՀ երրորդ նախագահ Սերժ Սարգսյանն ու նրա փեսա՝ Սուրբ Աթոռում ՀՀ նախկին դեսպան Միքայել Մինասյանը խայտառակ են եղել ընտրություններում այն բանի համար, որ նրանք իրենց ռեսուրսները կենտրոնացրել էին ՀՀ նախկին ՄԻՊ Արման Թաթոյանի վրա, իսկ վերջինս համեստ ձայներ է ստացել։ 

Ամենևին նպատակ չունենք ստանձնելու վերը նշված անձանցից որևէ մեկի փաստաբանությունը․ միայն նշենք, որ Արման Թաթոյանի ուղիղ և բոլորիս իմացած կապը, ասենք, Սերժ Սարգսյանի հետ միայն այնքանով է, որ նրա նախագահության օրոք է Արդարադատության փոխնախարար աշխատել ու ՄԻՊ ընտրվել։ Եթե նույն «Հայաստան» դաշինքի ցուցակը նայենք, ապա հաստատապես էլի մարդիկ կգտնենք, որ Սերժ Սարգսյանի կամ Ռոբերտ Քոչարյանի ժամանակ ինչ-որ պաշտոններ են զբաղեցրել։ Կենսագրություն չունենա՞ն։ Աշխատած չլինե՞ն պետական համակարգում, չիմանա՞ն պետության աշխատելու սկզբունքները, ձևը։

Կենսագրություն չունեցողների խմբի կառավարումն արդեն մի ամբողջ հայկական պետություն է արժեցել մեր ազգին․․․

Թաթոյանի հետ ամեն ինչ պարզ է․ նրա կուսակցությունը բոլորովին նոր է, Թաթոյանը, պարզ է, նույնիսկ եթե ունենար Սերժ Սարգսյանի ենթադրյալ աջակցությունը, ապա միևնույն է չուներ և չէր կարող ունենալ ոչ Սամվել Կարապետյանի, ոչ Ռոբերտ Քոչարյանի, ոչ էլ նույնիսկ Գագիկ Ծառուկյանի ֆինանսական ու մարդկային ռեսուրսները։  Եվ ստանալ ավելի քան 33,5 հազար քվե, կարծում ենք, այնքան էլ վատ արդյունք չէ։ Ինչևէ։  

Տպավորություն է, որ հոդվածի հեղինակը գտել է ընտրությունների տապալվելու գլխավոր մեղավորներին․ երկու մարդու, որ նույնիսկ չէին մասնակցում ընտրություններին։ 

Հիմա գանք հենց Ռոբերտ Քոչարյանի ղեկավարած ուժին։ 10 տարի երկիրը ղեկավարած անձը՝ 136 տարվա կուսակցության հետ միասին, 10 տոկոս ձայն չի հավաքել։ Մեկնաբանե՞ն։ Պիտակնե՞ր տան։ Ծաղրե՞ն։ Ձե՞ռք առնեն, թե դուք ընդամենը DVD-ի համար էիք պայքարում։ 

Խայտառակ չեղա՞վ «Հայաստան» դաշինքը, երբ նախորդ ընտրություններին ստացավ 269,481 ձայն, 5 տարի անց՝ գրեթե դրա կեսը՝ 144 983 ձայն։

Ուրիշի աչքի փուշը տեսնել ինչպե՞ս է հաջողվում, երբ աչքիդ գերանի չափերն այնպիսին են, որ ուրիշների աչքն են հանում․․․

                                                                    NEWSPRESS.am