«Վարչական ռեսուրսն օգտագործվում է աննախադեպ չափերով». Ավետիս Առաքելյան

Գյումրիի քաղաքապետի պարտականությունները կատարող Ավետիս Առաքելյանը լրագրողների հետ զրույցում անդրադարձել է ընտրությունների օրը քաղաքում արձանագրված ձերբակալություններին, ընտրական գործընթացի շուրջ հնչող ահազանգերին և քաղաքական իրավիճակին։

Առաքելյանի խոսքով՝ վաղ առավոտից Գյումրիում իրականացված ձերբակալությունները նորություն չէին իրենց համար, քանի որ նման զարգացումների էին սպասում։ Նա նշել է, որ իրավապահների գործողությունները տեղավորվում են այն ճնշումների շարքում, որոնք, իր գնահատմամբ, քաղաքում շարունակվում են արդեն երկար ժամանակ։

«Այս ճնշումները Գյումրիում նոր չեն։ Դրանք սկսվել են դեռևս նախորդ տարիներից, և այսօր արդեն գյումրեցին որոշակի իմունիտետ է ձեռք բերել նման երևույթների նկատմամբ։ Մենք տեսել ենք տարբեր քաղաքական հետապնդումներ, տեսել ենք ընդդիմադիր գործիչների նկատմամբ իրականացվող գործողություններ, և այսօրվա զարգացումները այդ նույն շղթայի շարունակությունն են»,– հայտարարել է նա։

Առաքելյանի փոխանցմամբ՝ առավոտյան ձերբակալվել և Երևան են տեղափոխվել մի քանի քաղաքացիներ։ Նրա խոսքով՝ որոշ անձինք հետագայում ազատ են արձակվել, սակայն եղել են նաև դեպքեր, երբ քաղաքացիները կրկին ձերբակալվել են։

Նա առանձնակի մտահոգիչ է համարել այն հանգամանքը, որ, իր պնդմամբ, իրավապահ գործողությունները իրականացվել են վաղ առավոտյան ժամերին՝ ընտանիքների ներկայությամբ։

 «Մենք տեսնում ենք իրավիճակներ, երբ մարդիկ իրենց երեխաների հետ տանն են եղել, և վաղ առավոտյան ժամերին իրականացվել են ձերբակալություններ։ Սա այն մթնոլորտը չէ, որը պետք է ուղեկցի ընտրական գործընթացին»,– նշել է քաղաքապետի պաշտոնակատարը։

«Այս ամենը վկայում է ընտրությունների նկատմամբ իշխանության անհանգստության մասին»

Անդրադառնալով ընտրական գործընթացի ընդհանուր մթնոլորտին՝ Առաքելյանը պնդել է, որ արձանագրված դեպքերը վկայում են իշխանությունների անհանգստության մասին։

Նրա խոսքով՝ ընտրությունների օրը գրանցվել են բազմաթիվ խախտումների վերաբերյալ ահազանգեր, որոնք փոխանցվել են քաղաքական ուժերի կենտրոնական շտաբներին՝ հետագա իրավական գնահատականի համար։

«Մենք արձանագրում ենք յուրաքանչյուր դեպք, հավաքագրում ենք փաստերը, տեսանյութերը և փոխանցում համապատասխան կառույցներին։ Ընտրություններից հետո կտրվի ընդհանուր գնահատական, և արդեն կքննարկվեն հետագա իրավական քայլերը»,– ասել է նա։

Առաքելյանը հայտնել է, որ իրենց քաղաքական թիմը բազմաթիվ ահազանգեր է ստացել որոշ ընտրատեղամասերում քվեաթերթիկների բացակայության վերաբերյալ։

Նրա խոսքով՝ արձանագրվել են նաև դեպքեր, երբ ընտրատեղամասերում հայտնվել են արդեն իսկ լրացված կամ ցուցադրված քվեաթերթիկներ, ինչպես նաև տեղեկություններ են ստացվել քվեարկության գաղտնիության հնարավոր խախտումների մասին։

«Մեզ մոտ տեղեկություններ են եղել, որ որոշ քաղաքացիներ լուսանկարել են իրենց քվեաթերթիկները։ Եթե նման փաստերը հաստատվեն, ապա դրանք կարող են լուրջ հարցեր առաջացնել ընտրական գործընթացի ազատության և գաղտնիության ապահովման տեսանկյունից»,– նշել է նա։

Քաղաքապետի պաշտոնակատարի խոսքով՝ որոշ ընտրատեղամասերում իրենց վստահված անձանց տրամադրված փաստաթղթերի և հավատարմագրերի հետ կապված խնդիրներ են եղել, որոնց վերաբերյալ ևս բողոքներ են ներկայացվել։

Ավետիս Առաքելյանը քննադատել է նաև, իր ձևակերպմամբ, վարչական ռեսուրսի կիրառման ծավալները։

Նրա խոսքով՝ տարբեր պետական կառույցներում աշխատող քաղաքացիներ զգում են ճնշումներ և ստիպված են հաշվի նստել քաղաքական գործոնների հետ։

«Վարչական ռեսուրսն օգտագործվում է այնպիսի ծավալներով, որ մարդիկ հաճախ մտավախություն ունեն անգամ քաղաքական գործընթացներին մասնակցելու համար։ Այսպիսի իրավիճակ ես անձամբ չեմ հիշում Գյումրիի ընտրությունների պատմության ընթացքում»,– ասել է նա։

Առաքելյանը նաև հայտարարել է, որ ստացել են տեղեկություններ, ըստ որոնց՝ որոշ վստահված անձանց մեքենաները կանգնեցվել են պարեկային ծառայության աշխատակիցների կողմից, ինչի հետևանքով խոչընդոտվել է նրանց գործունեությունը։

Լրագրողների հարցին, թե արդյոք տեղի ունեցող զարգացումները կարող են ազդել ընտրողների կամքի վրա, Առաքելյանը պատասխանել է, որ գյումրեցիները նման ճնշումների նկատմամբ դիմադրողականություն ունեն։

«Գյումրեցին յուրահատուկ բնավորություն ունի։ Երբ նրա վրա ճնշում են գործադրում, նա հակառակ ազդեցությունն է ստանում և ավելի վճռական է դառնում իր դիրքորոշման մեջ։ Ես վստահ եմ, որ քաղաքացիները սեփական գնահատականը կտան տեղի ունեցողին»,– նշել է նա։

Ավետիս Առաքելյանը կրկին անդրադարձել է Գյումրու ընտրված քաղաքապետ Վարդան Ղուկասյանի շուրջ ստեղծված իրավիճակին՝ պնդելով, որ նրա նկատմամբ իրականացվող գործողությունները քաղաքական բնույթ ունեն։

Նրա խոսքով՝ գյումրեցիները չեն ընդունի այնպիսի զարգացումներ, որոնց արդյունքում, իրենց կարծիքով, ուժային մեթոդներով կփորձեն ազդեցություն ունենալ քաղաքային իշխանությունների վրա։

«Գյումրեցիները իրենց ընտրությունը կատարել են, և որևէ մեկը չի կարող ուժային մեթոդներով փոխել այդ ընտրության քաղաքական նշանակությունը։ Քաղաքի բնակիչները դա շատ լավ հասկանում են»,– ասել է նա։

Ավետիս Առաքելյանը դիմել է քաղաքացիներին՝ կոչ անելով ակտիվորեն մասնակցել քվեարկությանը։

«Դիմում եմ բոլոր գյումրեցիներին՝ դուրս եկեք տներից, մասնակցեք ընտրություններին և արտահայտեք ձեր կամքը։ Յուրաքանչյուր ձայն կարևոր է, և յուրաքանչյուր քաղաքացի պետք է օգտվի իր ընտրական իրավունքից»,– հայտարարել է նա։

Առաքելյանի խոսքով՝ անկախ ընտրությունների արդյունքներից, ամենակարևորը քաղաքացիների ակտիվ մասնակցությունն է և ընտրական գործընթացի նկատմամբ հանրային վերահսկողությունը։