ՌՈ-ն զինապարտին ծանուցագիր հանձնելու լիազորություն չունի, բանակն էլ փորձադաշտ չէ... բաց նամակ Պապիկյանին

Ես քաջատեղյակ եմ, որ Դուք բանակային անցյալ չունեք, սակայն վերջին որոշումներն արդեն ցույց են տալիս բանակից հեռու լինելու գագաթնակետը։

 

Հիշեցնեմ` վարժական հավաքների մասնակցության համար զորակոչվում են տարածքային զինկոմիսարիատներում հաշվառված և համապատասխան զորամասերին կցագրված պահեստազորայինները։ Կցագրված ռեսուրսների ուսումնասիրությունն ու հաշվառումը մշտապես իրականացվում է զորամասերի կողմից` անձնական շփումների, հեռախոսազրույցների, փաստաթղթային ուսումնասիրությունների միջոցով` գնահատելով զինապարտի պատրաստվածությունը, մասնագիտական կարողությունները, բարոյահոգեբանական վիճակը, ընտանեկան պայմանները և այլ կարևոր հանգամանքներ։

 

Ռազմական ոստիկանությունը զինապարտին ծանուցագիր հանձնելու լիազորություն չունի։ Դա բացառապես զինկոմիսարիատների գործառույթն է։

 

Եվ ամենակարևոր հարցը.

 

Եթե ռազմական ոստիկանության կողմից հայտնաբերված և հավաքի ներկայացված անձը հետագայում մարտական հերթապահության ընթացքում կատարի կարգապահական խախտում, հանցանք կամ դրսևորի հոգեբանական անպատրաստություն, ո՞վ է կրելու դրա պատասխանատվությունը։

 

Բանակը փորձադաշտ չէ։ Բանակը համակարգ է, որտեղ յուրաքանչյուր գործողություն, յուրաքանչյուր լիազորություն և յուրաքանչյուր պատասխանատվություն հստակ սահմանված է օրենքով ու կանոնադրություններով։ Այդ սահմանների խախտումը վտանգավոր ինքնագործունեություն է: