Արթուր Օսիպյանը հրաժարվել է Անահիտ Մանասյանի ծառայություններից

«Երբ դեպքը տեղի է ունեցել, իմ հանձնարարությամբ ՄԻՊ աշխատակազմի իմ գործընկերները անմիջապես մեկնել են տեսակցելու Արթուր Օսիպյանին»,-կառավարության նիստից հետո ճեպազրույցների սրահում ասաց ՄԻՊ Անահիտ Մանասյանը:

ՄԻՊ-ի խոսքով՝  ի սկզբանե անձը հրաժարվել է իր գործընկերների հետ առանձնազրույց ունենալուց, բայց իրենք հրապարակային տեղեկատվություն են ուսումնասիրել և ինքը դեպքի հետ կապված հայտարարություն է տարածել։

«Դրանից հետո մենք, նաև մյուս գործիքների կիրառմամբ, որոնք հնարավոր են անձի համաձայնության բացակայության դեպքում, ևս փորձել ենք տարատեսակ գործիքներ կիրառել, մասնավորապես, նաև այս շաբաթ իմ հանձնարարությամբ մենք կանխարգելման ազգային մեխանիզմի շրջանակներում, որը ենթադրում է համակարգային խնդիրների բացահայտում և արձանագրում, այց ենք իրականացրել «Նուբարաշեն» ՔԿՀ, և այցի նպատակը ի սկզբանե իմ բոլոր հնարավոր որոշումներով սահմանել եմ՝ մի քանի կարևոր խնդիրների արձանագրում և մշտադիտարկում, այդ թվում՝ կարանտինային բաժանմունքի և հացադուլ իրականացնող անձանց հետ կապված խնդիրների հասցեավորումը: Այս համատեքստում պետք է նշեմ, որ հացադուլ հայտարարած անձանց ենք նաև այցելել, նրանց վիճակին ենք ծանոթացել, նրանց հետ կապված խնդիրներ ենք փորձել հասցեավորել: Մի շարք խնդիրներ են բարձրացրել հացադուլ հայտարարած անձինք. նշեմ, որ խոսքը բոլոր հացադուլ հայտարարած անձանց մասին է, նրանց խնդիրների, այդ թվում՝ Արթուր Օսիպյանի մասին: Քանի որ խոսքը կանխարգելման ազգային մեխանիզմի գործառույթի շրջանակներում է, մի շարք խնդիրներ տեղում են ստացել իրենց լուծումները. նկատի ունեմ ՔԿՀ-ի հետ կապված»,- ասաց Մանասյանը և անդրադառնալով Օսիպյանի առողջական վիճակին, հավելեց. 

«Բնականաբար, ինձ թույլ չեմ տա ներկայացնել, քանի որ դա նաև բժշկական գաղտնիք կամ անձնական տվյալ ներկայացնող տեղեկատվություն է ենթադրում, բայց մենք նաև պաշտոնապես կստանանք, քանի որ անձը նաև հետագայում հենց դիմել է մեզ, այսինքն դիմում է հասցեագրել, մենք նաև անձնական տվյալ ենթադրող տեղեկություններ կստանանք»:

Մանասյանը հայտարարեց, թե Օսիպյանի՝ ազատությունից զրկման հարցը  բազմաթիվ հարցեր է առաջացնում, քանի որ կա խափանման միջոց կալանքի կիրառման և խոսքի ազատության սահմանները խախտելու քրեական պատասխանատվության գործիքների կիրառման հարցը: