Ազատությունից զրկման հարցն այս անձի դեպքում բազմաթիվ հարցեր է առաջացնում. ՄԻՊ-ը՝ Արթուր Օսիպյանի մասին

Մարդու իրավունքների պաշտպանի գործառույթների մեջ չի մտնում ՀՀ-ում հացադուլ հայտարարած անձանց պահանջների բավարարումը, այս մասին Կառավարության նիստից հետո լրագրողների հետ ճեպազրույցում ասաց ՄԻՊ Անահիտ Մանասյանն՝ անդրադառնալով անազատության մեջ գտնվող Արթուր Օսիպյանի պահանջին:

Լրագրողները ՄԻՊ-ին հիշեցրեցին, որ հասարակական և քաղաքական տարբեր շրջանակներ Արթուր Օսիպյանին քաղբանտարկյալ են համարում և հարց հնչեցրեցին, թե արդյո՞ք Արթուր Օսիպյանը քաղբանտարկյալ է: Անահիտ Մանասյանն ի պատասխան հարցին՝ արձագանքեց. «Ես համարում եմ, որ ազատությունից զրկման հարցն այս անձի դեպքում ևս բազմաթիվ հարցեր է առաջացնում, բազմիցս եմ խոսել թե՛ խափանման միջոցի՝ կալանքի կիրառման մասին, թե՛ նաև խոսքի ազատության պարագայում քրեական պատասխանատվության ենթարկելու մասին»:

Հիշեցնենք՝ արցախցի Արթուր Օսիպյանը 2 ամսով կալանավորվել է։ Նա արդեն 16 օր է՝ հացադուլ է հայտարարել: Օսիպյանը պահանջում է, որ «Նիկոլ Փաշինյանը ներողություն խնդրի՝ իրեն Արցախից վախած անվանելու համար»:

Ըստ ՔԿ-ի՝ Օսիպյանը մարտի 22-ին Ֆեյսբուքի իր էջում վարչապետի հասցեին բռնություն գործադրելու հրապարակային կոչեր է արել, իսկ մայիսի 18-ին Օսիպյանը, իմանալով Արաբկիրում Նիկոլ Փաշինյանի և ՔՊ-ի նախընտրական քարոզարշավի մասին, գնացել և խոչընդոտել քարոզչության ընթացքը։

Ըստ հաղորդագրության՝ նա տեղում հայհոյանքներ և անպարկեշտ արտահայտություններ է հնչեցրել, չի ենթարկվել հավաքվածների հորդորներին և խախտել հասարակական կարգը։վ