«Անհաջող փորձ է ամոթալի իրավիճակից դուրս գալու». Սիմֆոնիկ նվագախումբը պատրաստ է հրապարակել Հանրայինին ուղղված պաշտոնական նամակները

Հանրային հեռուստաընկերությունը վստահեցնում է՝ Հայաստանի պետական սիմֆոնիկ նվագախմբի համերգների և գործունեության հեռարձակումը հեռուստաընկերության եթերում չի դադարեցվել։ NEWS.am–ի հարցմանն ի պատասխան Հանրային հեռուստաընկերությունից հայտնել են, թե նվագախմբին վերաբերող համերգային և տեղեկատվական բովանդակությունը շարունակաբար տեղ է գտել Հանրայինի տարբեր հարթակներում։

«Ուստի, նվագախմբի գործունեությանը չանդրադառնալու վերաբերյալ գնահատականները չեն արտացոլում եթերում առկա ամբողջական պատկերը և, հավանաբար, պայմանավորված են Հանրային հեռուստաընկերության բոլոր հարթակների և եթերային բովանդակության ամբողջական դիտարկման բացակայությամբ։ Ինչ վերաբերում է հանագործակցության ընթացքի վերաբերյալ տարբեր մեկնաբանություններին, դրանք կրում են սուբյեկտիվ բնույթներ և չեն կարող ամբողջությամբ բնութագրել երկու կառույցների աշխատանքային հարաբերությունները»,–մեր գրավոր հարցմանն ի պատասխան հայտնել են հեռուստաընկերությունից։

Հայաստանի պետական սիմֆոնիկ նվագախմբից մինչդեռ, NEWS.am–ի հարցմանն ի պատասխան հակադարձել են, նշելով, որ փաստելու համար ավելի վաղ իրենց արած հայտարարությունը, պատրաստ են տրամադրել Հանրային հեռուստաընկերության և Հանրային հեռարձակողիխորհրդի կողմից վերջին վեց ամիսների ընթացքում իրենց հասցեագրված, ինչպես նաև իրենց կողմից նրանց ուղղված բոլոր պաշտոնական նամակները՝ հրապարակման իրավունքով։

«Այդ փաստաթղթերից ակնհայտ կդառնա, որ Հանրային հեռուստաընկերությունը վերջին կես տարվա ընթացքում չի պատասխանել մեր կողմից իրեն հասցեագրված որևէ պաշտոնական նամակի։ Հետևաբար, վստահաբար կարելի է ասել, որ իրենց վերջին, բովանդակային հիմնավորումներից զուրկ պատասխանը պարզապես անհաջող փորձ է՝ մանևրելու և այս չափազանց անհարմար ու ամոթալի իրավիճակից դուրս գալու համար»,–հայտնել են նվագախմբից։

Արձագանքելով Հանրային հեռուստաընկերության կողմից հնչեցրած պնդմանը, որ համագործակցության ընթացքի վերաբերյալ տարբեր մեկնաբանությունները սուբյեկտիվ բնույթ են կրում և չեն արտացոլում երկու կառույցների աշխատանքային հարաբերությունները, Հայաստանի պետական սիմֆոնիկ նվագախմբից նշել են․

«Մենք համոզված ենք, որ Հանրայինի կողմից ներկայացված հիմնավորումները վերաբերում են ընդամենը մեկ-երկու առանձին դեպքերի, որոնք պայմանավորված են եղել կամ երրորդ կողմերի հետ կնքված պայմանագրային պարտավորություններով (օրինակ՝ «Սիմֆոնիկ Հայկո. Բաց երկնքի տակ» նախագիծը), կամ պետական կարևորություն ունեցող միջոցառումներով (օրինակ՝ հայ-ֆրանսիական բարեկամությանը նվիրված համերգըԳյումրիում)։ Սրանք այն բացառիկ դեպքերն են, որոնք նույնիսկ մեծ ցանկության դեպքում հնարավոր չէր չհեռարձակել։ Սակայն դրանք որևէ կերպ չեն կարող արդարացնել Հայաստանի պետականսիմֆոնիկ նվագախմբի համերգային և մշակութայինգործունեության համակարգային անտեսումըՀանրային հեռուստաընկերության եթերում»։

Ինչ վերաբերում է հեռուստահաղորդավարուհի Լուսինե Թովմասյանի աշխատանքից ազատմանը, Հանրային հեռուստաընկերությունից պնդել են, թե դա անձնական կամ մասնագիտական գնահատականներով պայմանավորված չէ։ Ըստ հաղորդավարուհու մինչդեռ, աշխատանքից ազատման պատճառը եղել է Հայաստանի պետական սիմֆոնիկ նվագախմբի գեղարվեստական ղեկավար և գլխավոր դիրիժոր Սերգեյ Սմբատյանի, ինչպես նաև դաշնակահար Լանգ Լանգի հետ հարցազրույցներ անցկացնելը։

«Հեռուստաընկերության ղեկավարը հանձնարարեց ինձ փոխարինել մեկ այլ հաղորդավարով այն հաղորդման մեջ, որի առաջին թողարկումն արդեն նկարահանված էր»,–ֆեյսբուքյան իր էջում հայտնել էր Թովմասյանը։

«Լուսինե Թովմասյանի հետ աշխատանքային հարաբերությունների դադարեցումը պայմանավորված չէ անձնական կամ մասնագիտական գնահատականներով։ Համաձայն գործող պայմանագրային կարգավորումների՝ այլ մեդիա գործունեության իրականացման դեպքում անհրաժեշտ է նախապես տեղեկացնել և ստանալ համապատասխան համաձայնությունը, ինչը նա չի արել։ Խախտումից հետո Թովմասյաին առաջարկվել է շարունակել աշխատանքը  Առաջին ալիքի առավոտյան ծրագրում, ինչից նա հրաժարվել է առաջադրելով ևս մեկ հաղորդում ունենալու պայման»,–մեր հարցմանն ի պատասխան հայտնել են Հանրային հեռուստաընկերությունից։